نێچیرڤان بارزانی: تاكە گەرەنتی پاراستنی دەسكەوتەكانمان یەكترقبووڵكردن و پێكەوە كاركردنە

ئاڤا نیوز

سەرۆكی هەرێمی كوردستان ڕایدەگەیێنێت، هێزمان لە یەكترقبووڵكردن و پێكەوەژیان و پێكەوە كاركردندایە، ئەوەش تاكە گەرەنتی پاراستنی دەستكەوتەكانمان و مسۆگەركردنی مافە دەستوورییەكانمانە.

چیرۆكی سەرەكی: نێچیرڤان بارزانی، سەرۆكی هەرێمی كوردستان بەبۆنەی هاتنی ساڵی نوێی زایینی 2026، پەیامێكی پیرۆزبایی بڵاوكردووەتەوە و هیوا دەخوازێت ساڵی نوێ، ساڵی بەدیهاتنی هیواكان، كۆتاییهاتنی قەیرانەكان بێت.

پەیامی فەرمی: نێچیرڤانی بارزانی لە بەشێكی پەیامەكەیدا دەڵێت، با هاتنی ساڵی نوێ بکەینە دەرفەتێک بۆ کردنەوەی لاپەڕەیەکی نوێ کە تێیدا ناکۆکییەکان بخەینە لاوە و گیانی تەبایی، لێبوردەیی و یەکڕیزی لەنێوان سەرجەم هێز و لایەنە سیاسییەکان و پێكهاته‌كاندا باڵادەست بێت. هێزمان لە یەکترقبووڵکردن و پێكه‌وه‌ژيان و پێکەوەکارکردندايە كه‌ تاکە گه‌ره‌نتي پاراستنی دەستکەوتەکانمان و مسۆگەرکردنی مافە دەستوورییەکانمانه‌.

دەقی پەیامەی نێچیرڤان بارزانی، سەرۆکی هەرێمی کوردستان:

ساڵی نوێی زایينی 2026، به‌گه‌رمى له‌ كوردستانييانى خۆشه‌ويست به‌ هه‌موو پێكهاته‌كانييه‌وه‌، له‌ کەسوکاری سەربەرزی شەهیدان، پێشمەرگە قارەمانەکان، هێزە ئەمنییەکان و تەواوی گەلانی عێراق و جیهان پيرۆز دەکەم. هیوادارم ساڵی نوێ، ساڵی بەدیهاتنی هیواکان، کۆتاییهاتنی قەیرانەکان و کردنەوەی دەرگای خێر و خۆشی بێت بۆ هەمووان.

با هاتنی ساڵی نوێ بکەینە دەرفەتێک بۆ کردنەوەی لاپەڕەیەکی نوێ کە تيایدا ناکۆکییەکان بخەینە لاوە و گیانی تەبایی، لێبوردەیی و یەکڕیزی لەنێوان سەرجەم هێز و لایەنە سیاسییەکان و پێكهاته‌كاندا باڵادەست بێت. هێزمان لە یەکترقبووڵکردن و پێكه‌وه‌ژيان و پێکەوەکارکردندايە كه‌ تاکە گه‌ره‌نتي پاراستنی دەستکەوتەکانمان و مسۆگەرکردنی مافە دەستوورییەکانمانه‌.

لەسەر ئاستی عێراقيش هیوادارین ساڵی نوێ، ساڵی چارەسەرکردنی بنەڕەتیی کێشەکان بێت لەسەر بنەمای دەستوور و هاوبەشیی ڕاستەقینە. هەرێمی کوردستان وەک هەمیشە دەستپێشخەر و ئامادەیە بۆ گفتوگۆ و لێکگەیشتن. وه‌ك هه‌ميشه‌ فاكته‌ر‌ى ئارامى و سه‌قامگيرى ده‌بێت له‌ ناوچه‌كه‌دا و له‌ هه‌ر كوێى جيهان بێت به‌ هه‌موو شێوه‌يه‌ك پشتگيرى له‌ ئاشتى ده‌كات.

كوردستانییانی خۆشەویست،

با بە ئومێد و گەشبینییەوە له‌ داهاتوو بڕوانين. دڵنیاتان دەکەینەوە کە هەموو هەوڵێکمان دەخەینە گەڕ بۆ ئەوەی ساڵی 2026، ساڵی چەسپاندنی سەقامگیری و باشترکردنی ژیان و گوزه‌رانی هاووڵاتییان بێت. ئێمە باوەڕمان بە توانا و وزەی گەنجان و دڵسۆزیی گه‌لى كوردستان هەیە بۆ بنیاتنانی داهاتوويه‌كى گەشتر.

ساڵی نوێ لە هەمووتان پیرۆز بێت، هەر شاد و سەرفراز بن.