لە پارێزگای هەولێر پێنج ئەوەندەی ساڵی پار باران باریوە

ئاڤا نیوز

 

بەراورد بە هەمان كاتی ساڵی پار، ئەمساڵ تاوەكوو 3ـی مانگی یەک، پێنج ئەوەندەی ساڵی پار باران باریوە.

 

وێنە گەورەكە: بەپێی ئامارە فەرمییەكانی بەڕێوەبەرایەتیی كەشناسی و بوومەلەرزەزانیی هەرێمی كوردستان، پارساڵ لە پارێزگای هەولێر تا ئەم كاتانە، بڕی 43 ملیمەتر باران باریبوو، ئەمساڵ تا ئێستا زیاتر لە 230 ملم باران باریوە و جیاوازییەكە دەكاتە 187.6 ملیمەتر.

 

بڵاوکراوەی فەرمی: لەمبارەیەوە پارێزگای هەولێر بڵاوی كردووەتەوە، سەرەڕای ئەوەی بەراورد بە ساڵانی ڕابردوو، ڕێژەی بارانبارین جیاوازییەكەی زۆرە، بەڵام بەهۆی سەرجەم ئەو ڕێكار و چارەسەرییانەی كە لە ماوەی ڕابردوودا گیراونەتەبەر، توانرا شاری هەولێر لە مەترسیی لافاو پارێزراو بێت و هیچ جۆرە مەترسییەك بۆ سەرو ماڵی هاووڵاتیان دروست نەبوو.

 

خاڵە ئەرێنییەکان: بەهۆی بارانبارینی چڕی 24 كاتژمێری ڕابردوو، ئاستی ئاوی سەرزەوی و ژێرزەویی هەرێمی كوردستان بە ڕێژەیەكی بەرچاو زیادی كردووە و چەند بەنداوێكیش سەرڕێژ بوون، جگە لە تەقینەوەی دەیان كانیاو كە ساڵانێكی زۆر وشك ببوون.