بەشێک کێڵگە نەوتییەکانی ڤەنزوێلا دادەخرێن

ئاڤا نیوز

 

کۆمپانیای نەوتی نیشتمانیی ڤەنزوێلا داوای لە چەندین کۆمپانیا کردووە بەرهەمهێنانی نەوتی خاو کەم بکەنەوە و بەشێک لە کێڵگە نەوتییەکان دابخەن. ئەم بڕیارە دوای ئەوە دێت کە کۆگاکانی نەوت لێیان ڕژاوە و وڵاتەکە نەیتوانیوە بەرهەمی نەوتەکەی هەناردە بکات.

 

بۆچی گرنگە: ڤەنزوێلا ئەندامێکی دامەزرێنەری ئۆپێکە، هەر وەستانێکی بەرهەمهێنان لەم وڵاتەدا دەبێتە هۆی بەرزبوونەوەی نرخی نەوت لە بازاڕە جیهانییەکاندا، بەتایبەت ئەو جۆرە نەوتە خەستەی کە پاڵاوگەکانی کەنداوی مەکسیک پێویستیانە.

 
زانیاریی بەدەستهاتوو: سێ سەرچاوەی ئاگادار بە ئاژانسی ڕۆیتەرزیان ڕاگەیاندووە، سێ هۆکاری سەرەکی لەپشت ئەم بڕیارەوەن، یەکەم بەهۆی نەمانی توانای هەناردەکردن، نەوتێکی زۆر لە کۆگاکاندا کەڵەکە بووە و شوێن بۆ نەوتی نوێ نەماوەتەوە.

 

هەروەها نەوتی ڤەنزوێلا زۆر خەستە و پێویستی بە ماددەی کیمیایی هەیە بۆ ئەوەی ڕوون ببێتەوە و لە بۆرییەکاندا بڕوات، بەهۆی گەمارۆکانەوە ئەو ماددانە ناگەنە دەستی وڵاتەکە.

 

زانیاریی زیاتر: جگە لەوەش دوای ئەوەی هێزەکانی ئەمریکا ڕۆژی شەممە نیکۆلاس مادورۆ، سەرۆکی وڵات و هاوسەرەکەیان لە ڤەنزوێلا دەستگیر کرد، واشنتن بلۆککردنی سەرجەم ئەو تانکەرانەی ڕاگەیاند کە سزایان لەسەرە و دەیانەوێت بچنە ناو ئاوەکانی ڤەنزوێلا یان لێی بچنە دەرەوە.

 

ئەمەش بزانە: ڤەنزوێلا خاوەنی گەورەترین یەدەگی نەوتە لە جیهاندا، بەڵام بەهۆی سزاکان و خراپیی بەڕێوەبردن، ژێرخانی نەوتیی ئەو وڵاتە لە دۆخێکی زۆر خراپدایە.