میدیای عەرەبی: ژمارەیەک زیندانی لە گرتووخانەیەکی ژێر دەسەڵاتی هەسەدە هەڵدێن

ئاڤا نیوز

 

میدیا عەرەبییەکان بە پشتبەستن بە سەرچاوە هەواڵییەکان بڵاویانکردەوە، ژمارەیەک دەستگیرکراو لە زیندانیێکی ناوچەی شەقیفی ژێر دەسەڵاتی هەسەدە بەرەو شوێنێکی نادیار و دوور لە دەسەڵاتی حکومەتی سووریا هەڵاتوون.

 

چیرۆکی سەرەکی: هەڵاتنی زیندانییەکانی ژێر دەسەڵاتی هەسەدە، مەترسیی لەسەر هەموو جیهان هەیە، بەو پێیەی بەردەوام تیرۆریستە مەترسیدارەکانی داعش و باندەکانی ماددەی هۆشبەر دەستگیردەکرێن، بەڵام لە پاش هێرشەکەی سوپای سووریا بۆ ناوچە کوردنشینەکان، ژمارەیەک لە زیندانییەکان هەڵاتوون، تا ئێستا ژمارەی ورد و ناسنامەی هەڵاتووەکان ئاشکرا نەکراوە و سەرەڕای دەنگدانەوەی هەواڵەکە، هێزەکانی سووریای دیموکرات (هەسەدە) و سوپای سووریا هیچ ڕاگەیەندراوێکی فەرمییان بڵاونەکردووەتەوە.

 

لەلایەکی دیکەوە: سەرچاوەیەک لە سوپای سووریا ئاماژەی بەوە کردووە دوای کۆتاییهاتنی ئۆپراسیۆنی بەدواداچوون بۆ دەستگیرکردنەوەیان، تەواوی ڕاستییەکان بۆ ڕای گشتی ڕوون دەکرێنەوە.

 

باکگراوند: بڵاوبوونەوەی ئەم هەواڵە لە کاتێکدایە ئەمڕۆ سوپای سووریا ئۆپەراسیۆنێکی سەربازیی دژی هێزەکانی سووریای دیموکرات (هەسەدە) لە گەڕەکەکانی شێخ مەقسوود و ئەشرەفیە لە شاری حەلەب دەستپێکردووە.