ئەنەکەسە: گۆڕینی گەڕەکە کوردییەکانی حەلەب بۆ ناوچەی سەربازی پێشهاتێکی مەترسیدارە

ئاڤا نیوز

ئەنجوومەنی نیشتمانیی کورد لە سووریا (ئەنەکەسە)، لە ڕاگەیێنراوێکدا هۆشداری دەداتە حکومەتی سووریا لەبارەی هێرشکردنە سەر گەڕەکەکانی شێخ مەقسوود و ئەشرەفییە و داوای ڕاگرتنی دەستبەجێی بۆردومانەکان دەکات.

 

ڕاگەیێنراوی فەرمی: ئەمینداریەتیی گشتیی ئەنەکەسە لە ڕاگەیێنراوێکدا ئاماژەی بەوە کرد: "پۆلێنکردنی گەڕەکە کوردییەکان وەک (ناوچەی سەربازی) لەلایەن سوپای سووریاوە، نیشانەیەکی مەترسیدارە و دەبێتە هۆی کوژرانی دەیان هاووڵاتی و ئاوارەبوونی هەزاران خێزان؛ بۆیە پێویستە ئۆپەراسیۆنە سەربازییەکان دەستبەجێ ڕابگیرێن."

 

ئەنەکەسە جەختی لەمانەش کردەوە: 

٠ بەهۆی بۆردومانی تۆپخانە و مووشەکەوە، دەیان مەدەنی بوونەتە قوربانی و قەیرانێکی مرۆیی قووڵ لە شارەکەدا دروست بووە.

٠ داوای هەڵگرتنی گەمارۆ، گەیاندنی هاوکاری پزیشکی و دوورخستنەوەی ململانێ چەکدارییەکان لە ناوچە نیشتەجێبووەکان دەکەین.

٠ ئەنجوومەنەکە داوا لە دیمەشق دەکات پەنا بۆ دیالۆگ ببات و مافە دەستوورییەکانی گەلی کورد و پێکهاتەکانی تر مسۆگەر بکات وەک تاقە ڕێگە بۆ ئاشتی.

زانیاریی زیاتر: ماوەی دوو ڕۆژە هێزەکانی سەر بە حکومەتی سووریا گەڕەکەکانی شێخ مەقسوود و ئەشرەفییەیان گەمارۆداوە. کاتژمێر 3ـی ئێوارەی ئەمڕۆ چوارشەممە (7ـی کانوونی دووەمی 2026)، بڕیاری هێرشکردنە سەر ئەو دوو گەڕەکە درا، ئەمەش دوای ئەوە دێت کە گروپە چەکدارەکانی ئۆپۆزسیۆن لە چەند لایەکی ترەوە پێشڕەوییان بەرەو ناو جەرگەی حەلەب کردووە.