گەڕەکە کوردییەکانی حەلەب؛ کوردستانێکی دابڕاو لەبەردەم داگیرکردندا

ئاڤا نیوز

 

لە دوێنێوە شەڕی نێوان هێزەکانی ئاسایشی ناوخۆی سەر بە هێزەکانی سووریای دیموکرات (هەسەدە) و گرووپە چەکدارەکانی سەر بە حکومەتی سووریا لە گەڕەکەکانی شێخ مەقسوود و ئەشرەفیەی باکووری شاری حەلەب بەردەوامە.

 

چیرۆکی سەرەکی: لەو دوو گەڕەکە (شێخ مەقسوود و ئەشرەفییە) 250 هەزار کەس دەژین و زۆربەیان کوردن، دەمێکە گرژی لە حەلەب هەیە، بەڵام چەند ڕۆژێکە گەمارۆیەکی زۆر تووند خراوەتە سەر هەردوو گەڕەکەکە، سوپای سووریا هەردوو گەڕەکەکەی وەک ناوچەی سەربازیی داخراو ناساند، دواتر لە کاتژمێر 3:00ـی پاشنیوەڕۆی دوێنێ چوارشەممە، قەدەغەی هاتووچۆی ڕاگەیاند.

 

پەرەسەندنەکان: گرووپە چەکدارەکانی سەر بە حکومەتی سووریا، پاش نیوەڕۆی ڕۆژی چوار شەممە، بە چڕی دەستی بە بۆردوومانکردنی دوو گەڕەکەکە کرد، بەگوێرەی ئامارەکانی هەسەدە تا ئێستا نزیکەی 20 کەس کوژراون و 52 کەسیش بریندار بوون کە زۆربەی کوژراو و بریندارەکان مەدەنین، جگە لەوەی 10 هەزار کەس ئاوارە بوون بەرەو ناوچەکانی دیکەی پارێزگای حەلەب هەڵاتوون.

 

ئەوەی ئێستا ڕوودەدات: هێزەکانی کورد دەستەوەستان نەبوون، وەڵامی ‌گرووپە چەکدارەکانی سەر بە ئەحمەد شەرعیان دایەوە و سوپای سووریا دەڵێت بەهۆی بۆردوومانەکانی هەسەدە چوار کەس کوژراون و 18 کەسیش بریندارن.

 

پەرەسەندنەکان: لەبارەی شەڕی زەمینی، هەسەدە دەڵێت سوپای سووریا، هێرشی زەمینی کردووە و تێکیان شکاندوون، بەڵام سوپای سووریا رایگەیاندبوو هێشتا هیچ هێرشێکی زەمینییان نەکردووە و تەنها بۆردومانیان کردووە.

 

کاردانەوەی شەڕەکە: بەهۆی شەڕەکە فڕۆکەخانەی حەلەب داخراوە و هەموو گەشتێک تا کاتژمێر 11:00ی سبەی هەینی ڕاگیراون، ئەگەری درێژکردنەوەیشی هەیە، جگە لەوەی بەریتانیا وەک یەکەم وڵات هاتەسەرخەت، داوای کرد بەخێرایی دۆخەکە هێور بکرێتەوە و هاووڵاتیانی مەدەنی بپارێزرێن.

 

ڕاگەیێنراوی فەرمی: وەزارەتی دەرەوەی بەریتانیا دەڵێ لە نزیکەوە بەردەوام چاودێری دۆخەکە دەکەین، هاوکات ڕوانگەی سووری بۆ مافەکانی مرۆڤ هۆشداریی لە ئەنجامدانی کۆمەڵکوژی لەو دوو گەڕەکە دەکات.

 

لێدوانی فەرمی: مەزڵووم عەبدی، فەرماندەی گشتی هەسەدە دەڵێت: لەناو شاری حەلەب هیچ بوونێکی سەربازییان نییە، بەڵکو چەکدارەکان هێزی ئاسایش پارێزی خەڵکی ناوچەکەن، هەروەها هۆشداریش دەدات لەوەی مەترسی هەیە ئەم شەڕە فراوان بێت و تەواوی سووریا بگرێتەوە، بەرپرسیارێتییەکەش دەخاتە ئەستۆی ئەحمەد شەرع.

 

گۆشەیەکی دیکەی شەڕەکە: سوپای سووریا و گرووپە چەکدارەکانی سەر بە ئەحمەد شەرع دەڵێن، سوورن لەسەر ئەوەی هەردوو گەڕەکەکە کۆنترۆڵ بکەن، بەڵام ئەنجوومەنی گشتیی گەڕەکەکانیش دەڵێت: شەڕی خۆیان دەکەن و بەهیچ جۆرێک ڕێگە بە سوپای سووریا نادەن بچنە ناو گەڕەکەکان.

شێخ مەقسوود و ئەشرەفییە:

یەکەم:  ناسنامە و مێژوو:
دوو گەڕەکی بەیەکەوە لکاو و زۆرینە کوردنشینی شاری حەلەبن، لە چلەکانی سەدەی ڕابردووەوە وەک ناوەندێکی کوردی گەشەیان کردووە و ناسنامەی نەتەوەیی خۆیان لە ناو جەرگەی حەلەبدا پاراستووە.

دووەم: گرنگی ستراتیژی (بایەخی جوگرافی):
٠ بەرزترین خاڵ: شێخ مەقسوود بەرزترین ناوچەی حەلەبە؛ هەر هێزێک لێی بێت، دەتوانێت کۆنترۆڵی سەربازیی تەواوی شارەکە بکات.
٠ خاڵی بەیەکگەیشتن: ئەم دوو گەڕەکە دەروازەی سەرەکین کە شاری حەلەب بە ناوچەکانی عەفرین و شەهباوە دەبەستنەوە.
٠ ئەو دوو گەڕەکە ڕوویان لە ڕێگای کاستێلۆ کردووە کە خوێنبەرێکی سەرەکیی ئابووری لە شاری حەلەبە، ئەمەش وایکردووە ببنە خاڵێکی ستراتیژی لە ململانێ سەربازییەکان.

سێیەم: ژمارەی دانیشتووان و قەرەباڵغی:
دوای ساڵی 2011، ئەم ناوچانە بوونەتە پەناگەیەکی ئارام، بەهۆی کۆچی کوردانی ناوچەکانی دیکە و ئاوارەبوونی پێکهاتە جیاوازەکان، ژمارەی دانیشتووانیان بە شێوەیەکی بەرچاو زیادی کرد (سەدان هەزار کەس لێی نیشتەجێ بوون) بوونە یەکێک لە قەرەباڵغترین ناوچەکانی سووریا.

چوارەم: مۆدێلی حوکمڕانی (ئیدارەی خۆسەر):
سەرەڕای ئەوەی لە ڕووی جوگرافییەوە لە ناوچەکانی تری ڕۆژاڤا دابڕاون، بەڵام لە ڕووی سیاسی و کارگێڕییەوە سەر بە "ئیدارەی خۆسەری"ن سەر بر هێزەکانی سووریای دیموکرات (هەسەدە)ن. لە ساڵی 2012ەوە لەلایەن یەکینەکانی پاراستنی گەل (YPG) و هێزە ئەمنییە ناوخۆییەکانەوە بەڕێوە دەبرێن.

پێنچەم: گەمارۆ و تەحەددییە مرۆییەکان:
بۆ ماوەی چەندین ساڵە، ئەم گەڕەکانە لەژێر گەمارۆیەکی توندی ئابووریدان. سەرەتا لەلایەن حکومەتی سووریاوە و دواتر گروپە چەکدارییەکان و ئێستاش لەژێر گوشاری حوکمەتی سووریا، ئەمەش بووەتە هۆی کەمیی سووتەمەنی، دەرمان و پێداویستییە سەرەکییەکانی ژیان.

شەشەم: دۆخی ئێستا و ڕێککەوتنی 10 ئازار:
دوای گۆڕانکارییەکانی ئەم دواییەی حەلەب، ڕێککەوتنێک لە نێوان هەسەدە و "ئیدارەی ئۆپەراسیۆنەکان" (بە سەرۆکایەتی ئەحمەد شەرع) واژۆ کراوە، ئامانجی ڕێککەوتنەکە پاراستنی ئارامیی گەڕەکەکانە، بەڵام جێبەجێ نەکردنی ڕیکەوتنەکە دووبارە ئەم دوو گەڕەکە کوردنشینەی کردووەتە شوێنی پێکدادانی هێزەکانی نێو سووریا.

حەوتەم: ئێستا چی ڕوودەدات:
ڕۆژی 7-1-2026 سوپای سووریا دەستی بە ئۆپەراسیۆنێکی سەربازیی بۆ سەر گەڕەکەکان کردووەتەوە، هاوکات هێزەکانی ئاسایشی ناوخۆ دووپاتی دەکەنەوە کە ڕووبەڕووی هێرشێکی چڕ بە چەکی قورس بوونەتەوە.

لەلایەکی دیکەوە:  لە ڕاگەیێنراوێکدا هەسەدە دەڵێت، دۆسیەی ئەمنیی ئەو دوو گەڕەکە ڕادەستی ئاسایشی ناوخۆ کراوە و کشانەوەی هێزەکانیان لە حەلەب بە شێوەیەکی فەرمی و لەبەردەم میدیاکاندا پێشتر ئەنجامدراوە. ئەو دوو گەڕەکە زیاتر لە شەش مانگە گەمارۆدراون و هیچ مەترسییەکی سەربازییان بۆ سەر شارەکە نییە، بەڵکو تەنیا وەک پاساوێک بۆ ئەنجامدانی کۆمەڵکوژیی دژی مەدەنییەکان ئەو بانگەشانە دەکرێن.