گسکێکی کارەبایی داهێنراوە بەسەر قادرمەکاندا هەڵدەگەڕێت و پاکیان دەکاتەوە

ئاڤا نیوز

کۆمپانیای "Roborock" لە گەورەترین پێشانگای تەکنەلۆژیای جیهان (CES 2026)، نوێترین گسکی ڕۆبۆتیی نمایش کرد کە گەورەترین کێشەی خانمانی چارەسەر کردووە؛ گسکەکە دەتوانێت بە تەنیا بەسەر پلیکانەکاندا هەڵبگەڕێت و پاکیان بکاتەوە.

وێنە گەورەکە: تاوەکو ئێستا گسکە ڕۆبۆتییەکان تەنیا بۆ نهۆمێکی تەخت و بەبێ بەربەست گونجاو بوون، بەڵام ئەم داهێنانە نوێیە وەرچەرخانێکی گەورەیە لە ژیریی دەستکرد و میکانیکدا. ئێستا تەکنەلۆژیا گەیشتووەتە ناو ماڵەکان بە جۆرێک کە ڕۆبۆتەکە هاوشێوەی مرۆڤ "پێ"ی بۆ دروست کراوە بۆ بڕینی ئاستەنگە بەرزەکان.

بۆچی گرنگە: ئەم گسکە نەک تەنیا کات و ماندووبوونی مرۆڤ کەمدەکاتەوە، بەڵکو نیشانەی گەشەی خێرای "ڕۆبۆتە خزمەتگوزارەکانە" کە دەتوانن لە ژینگەی ئاڵۆزی ناو ماڵدا بە سەربەخۆیی بڕیار بدەن و کار بکەن، بێ ئەوەی لە شوێنێکدا گیر بخۆن یان پێویستییان بە گواستنەوە هەبێت.

زانیاریی زیاتر: تایبەتمەندییە سەرسوڕهێنەرەکانی ئەم ڕۆبۆتە بریتین لە:

پێی جوڵاو: لەبری تایەی سادە، دوو پێی میکانیکیی هەیە کە تایەیان پێوە لکێنراوە، ئەمەش ڕێگەی پێ دەدات پلیکانەکان یەک یەک ببڕێت.

خێرایی و کارایی: لە نمایشێکی ڕاستەوخۆدا، تەنیا لە 40 چرکەدا بەسەر پێنج پلیکانەدا سەرکەوت و بە تەواوی پاکی کردنەوە.

سیستەمی AdaptiLift: ڕێگە بە ڕۆبۆتەکە دەدات بەرزیی جەستەی خۆی بگۆڕێت، بەمەش دەتوانێت بەسەر بەربەستی 8.4 سانتیمەتریدا باز بدات و لەسەر فەرشی ئەستوور گیر نەخوات.

ژیریی دەستکرد: بەهۆی هەستەوەری سێ ڕەهەندییەوە، لە چەند چرکەیەکدا نەخشەی ماڵەکە دەخوێنێتەوە و خۆی لە پێکدادان دەپارێزێت.

ئەمەش بزانە: هەرچەندە کۆمپانیاکە هێشتا نرخی کۆتایی ئاشکرا نەکردووە، بەڵام شارەزایانی تەکنەلۆژیا پێشبینی دەکەن بەهای ئەم گسکە زیرەکە لە دوو هەزار و 600 دۆلار (26 وەرەقە) زیاتر بێت، کە ئەمەش دەبێتە یەکێک لە گرانترین و پێشکەوتووترین ئامێرەکانی ناوماڵ لە ساڵی 2026دا.