داواكاری گشتی: 859 سكاڵا لەسەر بەفیڕۆدانی موڵک و ماڵی گشتی و زێدەڕۆییەكان تۆماركراون

ئاڤا نیوز

 

دەزگای داواكاری گشتیی هەرێمی كوردستان لە ماوەی ساڵێكدا، 859 سكاڵای لەسەر مافی گشتی و بەفیڕۆدانی موڵك و ماڵی گشتی و لابردنی زێدەڕۆییەكان تۆماركردووە، هاوكات بەدواداچوونی بۆ سێ هەزار و 608 بابەتی جۆراوجۆر كردووە و لایەنی پەیوەندیداری لێ ئاگادار كردووەتەوە.

 

چیرۆكی سەرەكی: سەرۆکایەتی داواکاری گشتیی هەرێمی کوردستان، وەک یەکێک لە دەزگا گرنگ و سەرەکییەکانی وەزارەتی داد و پێکهاتەیەکی گرنگی سیستەمی دادوەری لە هەرێمدا، ئاماری کار و چالاکییەکانی ساڵی ڕابردووی بڵاودەکاتەوە؛ 859 سكاڵای تۆماركردووە، 3608 نووسراوی بەدواداچوونی ئاڕاستەی دامودەزگا پەیوەندیدارەكان كردووە.

 

ژمارەكان وا دەڵێن: ئەندامانی داواکاری گشتی هەزار و 696 جار بەشدارییان لە لیژنەکانی لێکۆڵینەوە و کارگێڕی و بەرزەفتکردنەكاندا کردووە.

 

-لە کۆی (هەزار و 790) دۆسیەی تاوانەکان کە لە دادگاکانی هەرێمی کوردستانەوە ڕەوانەکراون، نزیکەی سەرجەم دۆسیەکان هەر لە ساڵی 2025 یەکلاکراونەتەوە، ڕێژەی خێرا ڕاپەراندنی کارەکان 99.8٪ بووە ئەوەش لەپێناو ئەوەی یەکلاییکردنەوەی دۆسیەکانی دادگاکان دوانەکەوێت.

-ئەندامانی داواکاری گشتی لە دادگاكانی تاوان, دادگای نەوجەوانان، کەتن، تێهەڵچوونەوە، گومرگ ڕۆژانە وردبینییان لە پەڕاوی دۆسیەکان کردووە و ڕاپۆرتییان لە بارەیەوە داوە، ئەگەر پێویست بووبێت تانەشیان لە بڕیارەکانی دادگا داوە.

-بەمەبەستی ئاگاداربوون لە دۆسیەکانی لێکۆڵینەوە و چۆنیەتی بەڕێوەچوونی ڕێکارەکان بە گوێرەی یاسا و بەدواداچوون بۆ کەموکوڕییەکان، لە ماوەی ساڵێکدا زیاتر لە هەزار جار سەردانی بنکەی پۆلیس و ئاسایش و بەڕێوەبەرایەتییەکانی پۆلیس و ئاسایش و بنکەکانی بەرەنگاربوونەوەی توندوتیژی خێزانیان کردووە و سەرپێچییەکان تۆمارکراون و بەدواداچوونی بۆ کراوە. 

-ئەندامانی داواکاری گشتی لە ڕۆژانە سەردانی گرتووخانەکانیان کردووە لە بەڕێوەبەرایەتییەکانی چاکسازی لە هەر چوار پارێزگاکەی هەرێمی کوردستان بەهەردوو ئیدارەی گەرمیان و ڕاپەرینەوە بۆ بەدواداچوونی ڕەوشی ڕاگیراوان و حکومدراوان و گوێگرتن لە داواکاری و گلەییەکان و ئاگاداربوون لە کەموکورتییەکانیان.