ئامێری ATM لەبەردەم گشت فەرمانگەکان دادەنرێت

ئاڤا نیوز

 

بەڕێوەبەری گشتیی بانکە بازرگانییەکانی هەرێمی کوردستان ڕایگەیاند، لە درێژەی هەنگاوەكانی جێبەجێكردنی پڕۆژەی "هەژماری من" بۆ کۆتایی ساڵ تۆڕێک لە ئامێری ڕاكێشانی پارەی ATM دادەنرێت.

 

لێدوانی فەرمی: مەولوود سابیر، بەڕێوەبەری گشتیی بانکە بازرگانییەکانی هەرێمی کوردستان بۆ ئاڤا نیوز گوتی: بۆ ئەوەی حکومەتی هەرێمی کوردستان لە پڕۆژەی "هەژماری من" خزمەتگوزاریی ڕاكێشانی پارەی نەختێنە بۆ مووچەخۆرانی هەرێمی كوردستان دەستبەر بكات، ئێستا تیمی پڕۆژەی "هەژماری من" تۆڕێک لە ئامێری ڕاكێشانی پارەی ATM لەبەردەم گشت فەرمانگەکان دادەنێت.

 

ئەوەی پێویستە بیزانیت: بڕیارە تاوەکو کۆتایی ساڵی 2024، نزیکەی هەزار ئامێری ATM لە سەرجەم شار و شارۆچکەکانی هەرێمی کوردستان دابنرێت.

 

زانیاریی زیاتر: ڕۆژی 28-02-2023 سەرۆکوەزیران بارزانی، دەستپێشخەریی "هەژماری من"ـی ڕاگه‌یاند، کە بەرنامەیەکی گشتگیری داراییە بۆ فەرمانبەرانی کەرتی گشتی و خانەنشینان.

 

ژمارەکان وادەڵێن: بەپێی داتاكان تاوەکو ئێستا زیاتر لە 280 هەزار فەرمانبەر مامەڵەی "هەژماری من"ـیان کردووەتەوە؛ زیاتر لە 160 هەزار فەرمانبەریش كارتەكانیان وەرگرتووەتەوە.