ڕاگەیێنراوێک لە کۆشکی سپییەوە لەبارەی دەستپێکردنەوەی هەناردەی نەوتی کوردستان

ئاڤا نیوز 

 

کۆشکی سپی لە ڕاگەیێنراوێکدا ڕایگەیاند، ئەمریكا و عێراق خوازیاری دەستپێکردنەوەی هەناردەکردنەوەی نەوتی کوردستانن بۆ بەندەری جەیهانی تورکی.

 

ڕاگەیێنراوی فەرمی: کۆشکی سپیی ئەمریکا دوای کۆبوونەوەی نێوان جۆ بایدن و سوودانی ڕاگەیێنراوێکی لەبارەی هەناردەکردنەوەی نەوت، مووچەی فەرمانبەرانی هەرێمی کوردستان، هەڵبژاردن و پێشمەرگە بڵاوکردەوە، ئەمە بەشێکی ڕاگەیێنراوەکەیە:- 

 

• سەرۆکی ئەمەریکا پێزانینی خۆیی بۆ ڕۆڵی حکوومەتی هەرێمی کوردستان و حکوومەتی عێراقی فیداڵی سەبارەت بە چارەسەرکردنی کێشەکانی مووچە و دابینکردنی مووچەی مانگانەی فەرمانبەرانی هەرێمی کوردستان دەربڕیوە.

 

• بایدن پشتیوانی خۆیی بۆ چەسپاندنی پایەکانی دیموکراسی لە عێراق دەربڕیوە، بەتایبەت بەڕێوەچوونی هەڵبژاردنێکی ئازاد، دادەپەروەر و شەفاف لە هەرێمی کوردستان.

 

• بایدن و سوودانی، هەرێمی کوردستانیان وەک بەشێکی دانەبڕاو لە کۆی سیستەمی ئاسایش و سەقامگیری عێراق وەسف کردووە.

 

• پێشمەرگە و هێزە عێراقییەکان ڕۆڵی یەکلاکەرەوەیان لە تێکشکاندنی داعش بینیوە.

 

ئەوەی پێویستە بیزانیت: محەممەد شیاع سوودانی، سەرۆکوەزیرانی عێراق ڕۆژی 14-04-2024 سەردانی ئەمریکای کرد و چەندین کۆبوونەوەی لەگەڵ بەرپرسانی باڵای وڵاتەکە هەبووە.