پارتی لە کەرکووک: هیچ ڕێککەوتنێک بۆ یەکلاکردنەوەی پۆستی پارێزگار نەکراوە

ئاڤا نیوز

 

هەرچەندە کورد خاوەنی زۆرترین کورسیی ئەنجوومەنی پارێزگای کەرکووکە، بەڵام عەرەب و تورکمان ڕازی نین پۆستی پارێزگار بۆ کورد بێت، بەم هۆیەوەش زیاتر لە سێ مانگە پارێزگار دانەنراوە.

 

وێنە گەورەکە: دوای زیاتر لە چوار مانگ لە هەڵبژاردنی ئەنجوومەنی پارێزگاکانی عێراق، تاوەکو ئێستا پۆستەکانی پارێزگای یەکلانەکراوەتەوە، ئێستا بانگەشەی ئەوە دەکرێت کە چەند لایەنە براوەکان گەیشتوونەتە ڕێککەوتن لەسەر دیاریکردنی پارێزگار و پۆستەکانی دیکەی شارەکە. 

 

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە ئاڤا نیوزی گوت: "تاوەکو ئەمڕۆش هیچ ڕێککەوتنێک لەنێوان لایەنە براوەکانی هەڵبژاردنی ئەنجوومەنی پارێزگای کەرکووک نەکراوە".

 

هۆکارە زانراوەکان: سازشنەکردنی لایەنەکان بۆ یەکتر هۆکاری ئەوەیە بەو ئاراستەیە بچن کە دەبێت پارێزگاری کەرکووک بە نۆرە بێت لەنێوان لایەنە براوەکاندا.

 

ئەوەی پێویستە بیزانیت: تاوەکو ئێستا محەممەد شیاع سوودانی، سەرۆکوەزیرانی عێراق دوو کۆبونەوەی لەگەڵ هێزە براوەکانی کەرکووک کردووە، بەڵام بەهۆی ناکۆکییەوە هیچ ئەنجامێکی نەبووە.