ئەمریکا ڕێککەوتنێکی نێوان ڕووسیا و ئۆکراینا ئاشکرا دەکات

ئاڤا نیوز

نێردەی ئەمریکا ئاشکرای دەکات، ڕووسیا و ئۆکراینا لەسەر گۆڕینەوەی زیندانیانی جەنگ گەیشتنە ڕێککەوتن، ئەمەش لە چوارچێوەی دانوستانەکانی ئاشتیی نێوان هەردوولاوە دێت.

لێدوانی فەرمی: ستیڤ ویتکۆف، نوێنەری ئەمریکا ڕایگەیاند، ئەمڕۆ شاندەکانی ئەمریکا، ئۆکراینا و ڕووسیا ڕێککەوتن لەسەر ئاڵوگۆڕی 314 بارمتە لە نێوان ڕووسیا و ئۆکراینا کە لە کاتی جەنگدا بەدیل گیراون؛ جەختی لەوەش کردەوە کە ئەم دەرئەنجامە لە دانوستانەکانی ئاشتییەوە بەدەست هاتووە کە ورد و بەرهەمدار بوون، دەشڵێت: "کاری زیاتر لە پێشە".

زانیاریی زیاتر: ئەم ئاڵوگۆڕە بە یەکەم ئاڵوگۆڕی هاوشێوە لە نێوان هەردوولا لە ماوەی پێنج مانگی ڕابردووەوە دادەنرێت.

لەلایەکی دیکەوە: پێشتر ڤۆلۆدێمیر زێلێنسکی، سەرۆکی ئۆکراینا کاتێک لەلایەن نێردەی وڵاتەکەیەوە لەسەر ئەم پرسە ئاگادار کرایەوە، بە هەنگاوێکی بەرچاو وەسفی کرد و وتی: "لە ئایندەیەکی نزیکدا چاوەڕوانی ئاڵوگۆڕی دیلەکانی شەڕ دەکەین و دەبێت بگەڕێندرێنەوە ماڵەوە".

ئەوەی پێویستە بیزانیت: ئەم پێشکەوتنە مرۆییە لە چوارچێوەی دانوستانەکانی ئاشتی لە ئەبوزەبییەوە دێت، کە هەردوولا بۆ دووەم گەڕی دانوستان، ئەمڕۆ پێنجشەممە جارێکی دیکە لە چوارچێوەی بەردەوامیی دانوستانەکانی دوێنێ چوارشەممە، بە شێوەیەکی ڕاستەوخۆ بە نێوەندگیریی ئەمریکا کۆبوونەوە.