ستارمەر داوای لێبووردن دەکات و دەستلەکارناکێشێتەوە

ئاڤا نیوز

کیەر ستارمەر، سه‌رۆكوه‌زیرانی بەریتانیا، بە فەرمی داوای لێبووردنی لە قوربانیانی دۆسیەی "جێفری ئێپستین" کرد و دانی بەوەدا نا کە کاندیدکردنی پیتەر ماندێڵسۆن بۆ پۆستی باڵیۆز "هەڵە" بووە.

لێدوانی فەرمی: کیەر ستارمەر بە جۆش و خرۆشەوە ڕایگەیاند: داوای لێبووردن لە قوربانیان دەکەم کە بینیمان چۆن لێپرسینەوەیان لێ دواخرا و مافیان خوراوە، داوای لێبووردن دەکەم کە زۆرێک لە خاوەن دەسەڵاتەکان شکستیان هێنا لە پاراستنی ئێوە. باوەڕکردن بە درۆکانی ماندێڵسۆن و کاندیدکردنی بۆ ئەو پۆستە هەڵە بووە، بەڵام بەردەوام دەبم لە ئەنجامدانی ئەو کارە گرنگانەی لەسەر شانمانە.

زانیاریی زیاتر: کیەر ستارمەر، سه‌رۆكوه‌زیرانی بەریتانیا، بە فەرمی داوای لێبووردنی لە قوربانیانی دۆسیەی "جێفری ئێپستین" کرد. ئەم هەنگاوەی ستارمەر دوای ئەو شەپۆلە ناڕەزایەتییە توندە دێت کە بەهۆی دەستنیشانکردنی "پیتەر ماندێڵسۆن" وەک باڵیۆزی بەریتانیا لە ئەمریکا دروستبووە، چونکە ماندێلسۆن لە تاوانەکانی دوورگەی ئێپستیندا تێوە گلاوە.

لەلایەکی دیکەوە: ستارمەر ئاماژەی بەوە کرد کە "باوەڕکردن بە درۆکانی ماندێڵسۆن و کاندیدکردنی بۆ ئەو پۆستە" هەڵە بووە. هاوكات، سەرەڕای گوشارەکان، ستارمەر ڕایگەیاند کە بەردەوام دەبێت لە کارەکانی.

باکگراوند: دۆسیەی جێفری ئێپستین، ملیاردێری ئەمریکی کە لە ساڵی 2019 لە زینداندا کۆتایی بە ژیانی خۆی هێنا، یەکێکە لە گەورەترین فەزیحە سێکسییەکانی مێژووی هاوچەرخ کە ناوی چەندین سەرکردە و کەسایەتیی جیهانیی تێدا هاتووە. پیتەر ماندێڵسۆن، وەزیری پێشووی بەریتانیا، چەندین جار سەردانی ماڵەکانی ئێپستینی کردووە و پەیوەندییەکی نزیکیان هەبووە، ئەمەش چەندین ساڵە لە میدیاکانی بەریتانیا مشتومڕی لەسەرە.