نێچیرڤان بارزانی: عێراقێكی بەهێز پەیوەستە بە هەرێمی كوردستانی بەهێزەوە

ئاڤا نیوز

 

نێچیرڤان بارزانی، سەرۆکی هەرێمی کوردستان لە دیداری سلێمانی گوتارێکی پێشکەش کرد و گوتی: "مەترسییەکی زۆر لەسەر ئارامی و سەقامگیریی ناوچەکە هەیە، ڕێگە نادەین هەرێمی کوردستان ببێتە مایەی هەڕەشە بۆ هیچ دەوڵەتێک".

 

لێدوانی فەرمی: نێچیرڤان بارزانی، سەرۆکی هەرێمی کوردستان لە گوتارەکەیدا گوتی: ئێمە لە هەرێمی کوردستان لە دۆخێکی ئاڵۆزداین و چارەسەر ئەوەیە كای كۆن بە با نەكەین، هێز و حیزب و سەركردە سیاسیەكان دێن و دەڕۆن بەڵام نیشتمان و كوردستان دەمێننەوە، ئەگەر ڕێكنەكەوین هەموو شتەكان تێكدەچن، چارەسەر ئەوەیە واز لەڕابردوو بهێنین و خەڵک چاویان لە یەکڕیزیی لایەنە سیاسییەکانە.

 

زانیاریی زیاتر: لەبارەی هەڵبژاردنەکانی پەرلەمانی کوردستان سەرۆکی هەرێمی کوردستان دەڵێت، "دەتوانین بە بەشداری و ڕەزامەندی هەموو لایەک هەڵبژاردن بکەین".

 

چارەسەرەکان: نێچیرڤان بارزانی، پێی وایە کە پێویستە لایەنە سیاسییەكان بۆ بەرژەوەندیی نیشتمان ڕێكبكەون و گوتی: دەبێت ئەزموونی هەرێمی كوردستان بپارێزین و هەموومان پشتیوانی لە پاراستنی بكەین، نابێت كوردستان بكەینە قوربانی ناڕەزایی و توڕەییمان لە سیاسییەكان. جەختی کردەوە کە بۆ چارەسەری كێشەكان لەسەر یەک مێز دادەنیشن.

 

گۆشەیەکی دیکەی دیمەنەکە: شەڕێكی گەورە لە غەززە ڕووی داوە مەترسی لەسەر دۆخەكە هەیە و ناوچەكە لە شەڕ و ئاڵۆزیدایە، دەبێت ڕێككەوتنێكی هاوسەنگ بۆ ئاشتی بكرێت لە ناوچەكەدا، دوو دەوڵەت بۆ كێشەكانی غەززە و ئیسرائیل چارەسەرە و  هەرێمی كوردستان پشتیوانی لە دامەزراندنی دەوڵەتی فەڵەستین دەكات. ئەمە قسەی سەرۆکی هەرێمی کوردستانە لەبارەی دۆخی ناوچەکە.