وەزیری پیشەسازیی عێراق: تا هەزار ساڵی تریش ناتوانین کارەبای پێویست دابین بکەین

ئاڤا نیوز

وەزیری پیشەسازیی عێراق دەڵێت، ئەگەر لەسەر پلان و پرۆژەی ئێستا بمێننەوە، تاوەکو هەزار ساڵی دیکەش ناتوانن کارەبای پێویست دابین بکەن.

وێنە گەورەکە: خالید بەتال، وەزیری پیشەسازی و کانزاکانی عێراق، لە پانێلێکدا لە دیداری سلێمانی، باسی چەند پرسێکی گرنگی کرد بەتایبەت دۆخی ئابووری و کەرتی کارەبا.

لێدوانی فەرمی: خالید بەتال لەبارەی کارەبا گوتی: "ئاڵنگاری گەورەمان لەبەردەمە بۆ بەرهەمهێنانی کارەبا و کەمکردنەوەی بەکارهێنان، دەێبت كار لەسەر بەهێزكردن و ڕێکخستنەوەی كەرتەکە بكەین، گەر لەسەر پلان و پرۆژەی ئێستا بمێنینەوە، تاوەکو هەزار ساڵی دیکەش ناتوانین کارەبای پێویست دابین بکەین".

زانیاریی زیاتر: وەزیری پیشەسازیی عێراق دەڵێت: بۆ بەرهەمهێنانی وزەی پاک پێویستمان بە کانزایە کە عێراق توانای دەرهێنانی ئەو کانزایانەی نییە، ئەمەش کێشەیەکی نوێ دروست دەکات، لەکاتێکدا ئابووری عێراق پشت بە نەوت دەبەستێت.

لەلایەکی دیکەوە: خالید بەتال باسی لەوە کرد وا سەیری عێراق دەکرێت وڵاتێکی دەوڵەمەندە، بەڵام وانییە و نیمچە دەوڵەمەندە، بەڵگەش داهاتی تاکە. گوتیشی: "کێشەی عێراق پێش ئەوەی ئابووری بێت کۆمەڵایەتییە، هاووڵاتی عێراقی بەردەوام دەیەوێت لە کەرتی گشتی دابمەزرێت، بەهۆی نەبوونی دەستەبەری کۆمەڵایەتی لە کەرتی تایبەتدا، سەرەڕای ئەوەی لە کەرتی تایبەتیش کار دەکات".

چارەسەرەکان: وەزیری پیشەسازیی عێراق چەند چارەسەرێکی خستەڕوو، لەوانە: زیادکردنی وەبەرهێنانی ناوخۆ و دەرەکی، فرەچەشنکردنی سەرچاوەکانی داهات، ڕێکخستنەوەی دابەشکردنی کارەبا بەگوێرەی بەرهەمهێنان.