سەرۆک بارزانی: ناکرێ لەو وادەیەی دیاری کراوە هەڵبژاردنێکی پاک و بێگەرد بەڕێوەبچێت

ئاڤا نیوز

سەرۆک بارزانی ڕایگەیاند "دواخستنی هەڵبژاردن بۆ چەند مانگێک زۆر گرنگترە لەوەی هەڵبژاردنێک بەڕێوە بچێت کە مافی دەنگدەران و پێکهاتەکان پێشێل کرابێت".

ڕاگەیێنراوی فەرمی: ڕۆژی چوارشەممە 17ی نیسانی 2024 لە شاری هەولێر سەرۆک بارزانی پێشوازی لە تۆماس سیلەر باڵیۆزی یەکێتیی ئەوروپا لە عێراق کرد، بیروڕا لەبارەی بارودۆخی سیاسیی عێراق و هەروەها هەڵبژاردنی هەرێمی کوردستان ئاڵوگۆڕ کرا.

لێدوانی فەرمی: سەرۆک بارزانی ڕایگەیاند: پارتی هەمیشە لەگەڵ هەڵبژاردن بووە و ئێستاش پارتی داوا دەکات بە زووترین کات ئەو سەرنج و بابەتە تەکنیکیانەی کە ڕێگرن لە بەڕێوەچوونی هەڵبژاردنێکی تەندروست چارەسەر بکرێن، هەروەها سیغەیەکی گونجاویش بۆ بەشداریی پێکهاتەکان و پێشێل نەبوونی مافەکانیان بدۆزرێتەوە.

زانیاریی زیاتر: سەرۆک بارزانی سوپاسی هەڵوێستی کۆمەڵگەی نێودەوڵەتی و نەتەوە یەکگرتووەکانی کرد کە بە پەرۆشیەوە هاتوونەتە سەر  هێڵ و بە بایەخەوە ڕا و تێبینیەکانی پارتیان وەرگرتووە و گوتی "ناکرێ لەو وادەیەی بۆ هەڵبژاردن دیاری کراوە هەڵبژاردنێکی پاک و بێگەرد بەڕێوەبچێت، بۆیە دواخستنی هەڵبژاردن بۆ چەند مانگێک زۆر گرنگترە لەوەی هەڵبژاردنێک بەڕێوەبچێت کە تێیدا مافی دەنگدەران و پێکهاتەکان پێشێل کرابێت".  

لە لایەکی دیکەوە: باڵیۆزی یەکێتیی ئەوروپا لە عێراق جەختی لەوە کردەوە یەکێتیی ئەوروپا تێبینی و سەرنجەکانی پارتی بە جددی وەرگرتووە، هەم یەکێتیی ئەوروپا و هەمیش نەتەوە یەکگرتووەکان لەسەر ئەوە هاوڕان کە هەڵبژاردن بە بێ بەشداریی حزبێکی گەورەی وەک پارتی، دیموکراتیانە و سەرکەوتوو نابێت.