خێزانێكی هه‌ولێر له‌ مه‌ترسیی كوژران ڕزگار دەکرێن

ئاڤا نیوز

دایکێکی تەمەن 40 ساڵ لەگەڵ چوار منداڵەکەیدا، دوای 15 ساڵ لە چەوسانەوە، ئەشکەنجەدان و هەڕەشەی کوشتن لەلایەن باوکی منداڵەکەیەوە، دواجار لەلایەن بەڕێوەبەرایەتی بەرەنگاربوونەوەی توندوتیژی دژی ئافرەتان و خێزانەوە پارێزگارییان لێکرا.

چیرۆکی سەرەکی: ئازارەکانی ئەم خێزانە تەنیا لای دایکەکە نەبووە، بەڵکو منداڵەکانیشی گرتووەتەوە،  لە ساڵی 2022ەوە، ماڵی جیا کردووەتەوە و داوای جیابوونەوەی کردووە، بەڵام پیاوەکە نە لە دادگا ئامادە دەبێت و نە دەست لە هەڕەشەکانی هەڵدەگرێت.

زانیاریی پەیامنێر: ئەم ئافرەتە، قسەی بۆ هیشام سەعید، پەیامنێری ئاڤا کردووە و دەڵێت: لە ماوەی هاوسەرگیرییەکەیدا، بەهۆی ئاڵوودەبوونی هاوسەرەکەی بە خواردنەوە کحوولییەکان و ماددەی هۆشبەر، ڕۆژانە بە دار و چەقۆ و ئاسن ئەشکەنجەی داون.

چی ڕوویدا: باوکەکە پێشتر منداڵەکانی بردووەتە لای خۆی و دوای ئەشکەنجەدان فڕێی داونەتە سەر شەقام، دواتر لە خانەی بێسەرپەرشتان وەرگیراون. کوڕە گەورەکەیان کە تەمەنی 22 ساڵە، بەهۆی ئەو توندوتیژییە زۆرەی باوکییەوە تووشی نەخۆشیی دەروونی بووە.

زانیاریی زیاتر: ئێستا سێ لە منداڵەکان دوو کچی سەروو 18 ساڵ و کوڕێکی 13 ساڵ لەگەڵ دایکیانن، بەڵام بەهۆی هەڕەشەی کوشتنەوە تەنانەت خزمەکانیشیان لە ترسی پیاوەکە نەیانوێراوە سەردانیان بکەن. 

لێدوانی فەرمی: دوای ئەوەی کەیسەکە لە ڕێگەی ئاڤاوە گەیشتە لایەنە پەیوەندیدارەکان، ڕائید کاروان جەمیل، بەرپرسی ڕاگەیاندنی بەڕێوەبەرایەتی توندوتیژی دژی ئافرەتان و خێزان لە هەولێر، دەستبەجێ هاتە سەر هێڵ و بە ئاڤای وت: "شوێنێکی ئارام و گونجاوی نیشتەجێبوونیان بۆ دابینکرا تاوەکو لە مەترسییەکانی ئەو پیاوە دوور بن."

ئەوەی پێویستە بیزانیت: ئەم کەیسە نموونەیەکە لە گرنگیی ڕۆڵی میدیا و خێرایی وەڵامدانەوەی دامەزراوە حکومییەکان لە پاراستنی ژیانی هاووڵاتیان. ئێستا دۆسیەکە لە ژێر چاودێریی یاسایی و ئەمنیدایە بۆ ئەوەی ڕێکاری توند بەرامبەر پیاوەکە بگیرێتە بەر.