وەزیرێکی حکومەتی سووریا بۆ یەکەمجار سەردانی حەسەکە دەکات

ئاڤا نیوز

سەرچاوەیەکی ئاگادار لە پارێزگای حەسەکە ڕایگەیاند، بڕیارە سبەی هەینی، وەزیری تەندروستی سووریا سەردانی پارێزگاکە بکات.

ڕاگەیێنراوی فەرمی: بەگوێرەی میدیای ڕۆژئاوای کوردستان، موسعەب عەلی، وەزیری تەندروستیی سووریا لە سەرەتای گەیشتنیدا بۆ حەسەکە لەگەڵ نوورەدین عیسا پارێزگاری حەسەکە کۆ دەبێتەوە، پاشان بە مەبەستی ئاگاداربوون لە دۆخی تەندروستی، سەردانی نەخۆشخانەی نیشتمانی لە شارەکەدا دەکات.

بۆچی گرنگە: دوای ڕێکەوتنی نێوان هەسەدە و حکومەتی دیمەشق، ئەمە وەک یەکەمین سەردانی فەرمی وەزیرێکی حکومەتی سووریا بۆ ئەو پارێزگایە ئەژمار دەکرێت.

لەلایەکی دیکەوە: ڕائید ساڵح، وەزیری فریاگوزاری و بەڕێوەبردنی کارەساتەکان دووپاتی کردبووەوە، کە ئامادەکارییە کارگێڕییەکان بەردەوامن، بۆ ئەوەی لە داهاتوویەکی نزیکدا شاندێکی وەزارەتەکەیان لە پارێزگای حەسەکە ئامادەییان هەبێت و سەردانی ناوچەکە بکەن.