ماکرۆن بۆ مەزڵووم عەبدی: ڕۆڵی هەسەدە بەرز دەنرخێنین

ئاڤا نیوز

فەرماندەیی هەسەدە لەبارەی کۆبوونەوەی نێوان مەزڵووم عەبدی و ئیمانوێل ماکرۆن، سەرۆکی فەرەنسا ڕاگەیێنراوێکی بڵاوکردەوە و تێیدا هاتووە، ماکرۆن ڕۆڵی هەسەدەی لە ڕووبەڕووبونەوەی تیرۆر بەرز نرخاندووە.

چیرۆکی سەرەکی: ئێوارەی ئەمڕۆ هەینی لە پەراوێزی کۆنفرانسی ئاسایشی میونشن، مەزڵووم عەبدی، فەرماندەی گشتی هێزەکانی هەسەدە و ئیلهام ئەحمەد، بەرپرسی پەیوەندییەکانی ئیدارەی خۆسەر، لەگەڵ ئیمانوێل ماکرۆن، سەرۆکی فەرەنسا کۆبوونەوە.

ڕاگەیێنراوی فەرمی: بەگوێرەی ڕاگەیێنراوێکی هەسەدە، مەزڵووم عەبدی لە دیدارەکە پێزانینی بۆ ماکرۆن و پاڵپشتییە بەردەوامەکانی فەرەنسا دەربڕیووە، بە تایبەت پەیوەست بە بەرەوپێشبردنی ئاگربەست و چەسپاندنی سەقامگیری لە ناوچەکە.

٠ لە دیدارەکە هەردوولا پێداگریان بۆ پاڵپشتی نێودەوڵەتی کردووە بۆ دڵنیابوونەوە لە جێبەجێکردنی ڕێککەوتنی 29ـی مانگی یەکی ئەمساڵ لەنێوان هەسەدە و حکومەتی سووریا بۆ جێبەجێکردنی ڕێککەوتنەکە.

٠ لەبەرامبەردا، ئیمانوێل ماکرۆن، سەرۆکی فەرەنسا دووپاتیکردەوەتەوە، فەرەنسا بەردەوام دەبێت لە هەوڵەکانی. هاوکات ستایشی ڕۆڵی هێزەکانی سووریای دیموکراتی کردووە بۆ ڕووبەڕووبونەوەی تیرۆر و پێشخستنی ئاسایش و سەقامگیری لە ناوچەکە.