نهێنییەکانی گوڵەشلێر؛ بۆچی ئەم گوڵە لە چیاکاندا کەم ناکات؟

ئاڤا نیوز

لە کوێستانە سەرکەشەکانی باڵەکایەتی، لەو شوێنەی بەفری چیا و نەغمەی بەسۆزی کەوەکان دەبنە ئاواز. لێرە، لە بناری 'گردە مەندیلە'، زەوی بەرگی سووری 'گوڵەشلێر'ی پۆشیوە. کاک مەجید، تەمەنی 63 ساڵە ئەو بە عەشقەوە سەختیی ڕێگەی بڕیوە تا خۆی بگەیەنێتە ناو مێرگی گوڵەشلێرەکانی باڵەکایەتی.

بۆچی گرنگە: نهێنیی مانەوە و زۆربوونی گوڵەشلێر لەوەدایە هیچ ئاژەڵێک بۆ خواردن لێی نزیک نابێتەوە. ئەم گوڵە بە قەدێکی ستوونی قاوەیی و گوڵە زەنگوڵ ئامێزە شۆڕبووەکانی تا بڵێی جوان و دڵگیرە. گوڵەشلێر کە باڵای لە نێوان نیو مەتر بۆ مەترێکدایە، تەنها لە خاکێکی نەرم و لە ژێر تیشکی گەرمی خۆردا گەشە دەکات.