لە بەرامبەر پۆستی سەرۆکی ئەنجوومەنی نوێنەران دوو وەزارەت بە حەلبووسی دەدرێت

ئاڤا نیوز

 

ئەندامێکی ئەنجوومەنی نوێنەرانی عێراق ئاماژە بەوەدەدات، دوو بژارە بۆ هەڵبژاردنی سەرۆکی ئەنجوومەنی نوێنەران هەیە، یەکێکیان پێدانی پۆستی دوو وەزیرە بە هاوپەیمانیی تەقەدووم لە بەرامبەر دەستبەرداربوون لە پۆستی سەرۆکی ئەنجوومەن.

 

وێنە گەورەکە: زیاتر لە سێ مانگ بەسەر دانیشتنی ئەنجوومەنی نوێنەران بۆ هەڵبژاردنی سەرۆک تێپەریوە و سوننەکان لەسەر یەکلایکردنەوەی بەربژێرێک بۆ شوێنگرەوەی حەلبووسی ڕێکنەکەوتوون.

 

لێدوانی فەرمی: شێروان دووبەردانی، ئەندامی ئەنجوومەنی نوێنەرانی عێراق بە ئاڤا نیوزت گوت: "لایەنەکانی چوارچێوەی هەماهەنگی بوونەتە دووبەش، زۆرینەیان پاڵپشتی سالم عیساوی، بەربژێری سیادە دەکەن و بەشێکی دیکە لەگەڵ دانانی مەحموود مەشهەدانین".

 

ئەوەی پێشبینی دەکرێت: ئەو دوو بژارەیەی لەبەردەم حەلبووسی هەن، یەکێکیان یەکلایی کردنەوەی دەنگی ئەندامانییەتی لە بەرژەوەندیی مەشهەدانی یان تەڵاڵ زوبەیعی؛ بژارەی دووەم ئەوەیە دوو وەزارەتی پێبدرێت لە بەرامبەردا سالم عیساوی ببێتە سەرۆکی ئەنجوومەنی نوێنەران. 

 

لەلایەکی دیکەوە: ڕۆژی چوارشەممە شەعلان کرەیم، سەرۆکی فراکسیۆنی هاوپەیمانیی تەقەدووم و بەربژێری ئەو هاوپەیمانێتییە، کشانەوەی خۆی لە بەربژێربوون و فراکسیۆنەکەی ڕاگەیاند.