سەرۆکوەزیران بارزانی پێنج داواکاریی نەخۆشخانەکانی سووتانی جێبەجێ دەکات

ئاڤا نیوز

 

بە بڕیاری سەرۆکوەزیران بارزانی، پێنج داواکاری نەخۆشخانەکانی سووتان لە هەر سێ پارێزگای هەولێر و سلێمانی و دهۆک جێبەجێ دەکرێن، کە لە مانگی شەش و لە میانی گفتوگۆی نێوان سەرۆکوەزیران بارزانی و خەڵک لە هەولێر، بەڵێنی چارەسەری کێشەکانیانی دا.

 

چیرۆکی سەرەکی: دوای کارەساتەکەی حەمدانیە، سەرۆکوەیزان بارزانی لە سەنتەری سووتان سەردانی بریندارەکانی کرد و دواتریش پەرستارێک کە بەشداری گفتوگۆی نێوان سەرۆکوەزیران بارزانی و خەڵکی کردبوو، داواکاری و کەموکوڕییەکانی ئەو نەخۆشخانانەی خستە ڕوو.

 

لێدوانی فەرمی: د. سامان بەرزنجی ـ وەزیری تەندروستی هەرێمی کوردستان بە ئاڤا نیوزی ڕاگەیاند: "سەرۆکوەزیران پێنج داواکاریی نەخۆشخانەکانی سووتانی جێبەجی کرد، ئەمەش دوای بەرزکردنەوەی داواکاریی کارمەندانی نەخۆشخانەکان هات و ئێمەش وەک وەزارەتی تەندروستی لێژنەی تایبەتمان پێک هێنا و داواکارییەکانمان بۆ بەڕێزیان بەرز کردەوە".

 

ئەوەی پێویستە بیزانیت: بە گوێرەی بڕیارەکەی سەرۆکوەزیران بارزانی، ئەم داواکارییانە جێبەجێ دەکرێن:

ـ زیادکردنی پێشینەی مانگانە بۆ پێداویستییەکانی ڕۆژانە

ـ زیادکردنی دەرماڵەی مەترسی بەڕێژەی 50% بۆ 100%

ـ دابینکردنی ئۆتۆمبێلی خزمەتگوزاری بۆ نەخۆشخانەکان

ـ دابینکردنی ئامێری پێویست بۆ نەخۆشخانەکان و نۆژەنکردنەوەی بەشێکیان

ـ ڕەزامەندی لەسەر دابینکردنی ستافی پێویست و زیادکردنی ژمارەیان