سوپای عێراق بەرپرسێکی داعشی کوشت

ئاڤا نیوز

فەرماندەیی ئۆپەراسیۆنە هاوبەشەکانی عێراق ڕایگەیاند، والیی دیالەی ڕێکخراوی تیرۆریستیی داعش لە هێرشێکی فڕۆکەوانیی سوپای عێراق  کوژراوە.

ڕاگەیێنراوە فەرمییەكان: فەرماندەیی ئۆپەراسیۆنە هاوبەشەکانی عێراق ڕایگەیاند: بەیانیی ڕۆژی سێشەممە بۆردوومانی پەناگەیەکی داعشیان لە زنجیرە چیاکانی حەمرین لە پارێزگای دیالە  کردووە و دوو ئەندامی ئەو ڕێکخراوە کوژراون.

لە لایەكی دیكەوە: سەڵاح زەینی ـ ئەندامی لیژنەی ئاسایش و بەرگریی لە پەرلەمانی عێراق ڕایگەیاند: لە ئەنجامی ئەو هێرشەی سوپای عێراق یاسین باسم ڕوبەیعی (ناسراو بە ئەبوو لەیلا) والیی داعش لە دیالە و دكتۆر حوزەیفە بەرپرسی پزیشکانی داعش لەو شارە کوژراون.

باکگراوند: لە ساڵی 2017 هێزەکانی عێراقی و پێشمەرگە بە پاڵپشتیی هێزەکانی هاوپەیمانیی نێودەوڵەتی، ڕێکخراوی تیرۆریستیی داعشیان لە عێراق تێک شکاند، بەڵام هێشتا مەترسییان ماوە و ناوبەناو هێرش دەکەنە سەر خەڵکی سڤیل و هێزە ئەمنییەکان.