لە عێراق زنجیرە دزییەکانی سەدە بەردەوامە

ئاڤا نیوز

 

لیژنەیەک بۆ گەورەترین دۆسیەی گەندەڵیی ماددی لە عێراق پێک دەهێنرێت، گومان دەکرێت قەبارەی گەندەڵییەکە 20 ترلیۆن دیناری عێراقی بێت کە دەکاتە زیاتر لە 13 ملیار دۆلار.

 

لێدوانی فەرمی: "لیژنەیەک لەبارەی گەورەترین دۆسیەی گەندەڵی لە عێراق پێک هێنرا، ئەم لیژنەیە لە 13 پەرلەمانتار پێک هاتووە و ژمارەیەک نووسراوی بۆ سەرجەم لایەنە پەیوەندیدارکان کردووە بە مەبەستی لێکۆڵینەوە، دواتر ئەنجامی دۆسیەی گەندەڵییەکە بۆ ڕای گشتی و پەرلەمان ئاشکرا دەکەین"، سیپان عه‌زیز، ئه‌ندامی لیژنه‌ی لێکۆلینەوەکە، وای بە ئاڤا نیوز گوت. 

 

ئەوەی پێویستە بیزانیت: لیژنەکە دەستی بە لێکۆڵینەوە و بەدواداچوون لەسەر کۆمپانیای گشتیی بەندەرەکانی عێراق بە تایبەت گرێبەست و داهات و کارەکانیان لە بەندەری فاو کردووە، گومانی هەبوونی گەندەڵی بە قەبارەی 20 ترلیۆن دیناری عێراقی دەکرێت.

 

زانیاریی زیاتر: لە عێراق سەرەڕای گەندەڵییەکی زۆر لە بواری پڕۆژەکان، بە ئاشکرا دزیی گەورەش ڕوویان داوە لە نێو بانکەکان وەک ئەو دزییەی کە لە بانکی ڕافیدەین کرا و 2.5 ملیار دۆلار دزرا.  دزی و گەندەڵییەکەی ئەمجارەش پەیوەندی بە پڕۆژەی بەندەری فاوی گەورەوە هەیە کە یەکێک لە گەورەترین بەندەرەکانی کەنداوی عەرەبی و دەیەم گەورەترین بەندەری جیهانە.