شاندێکی ئەمنیی عێراق سەردانی کۆرمۆر دەکات

ئاڤا نیوز 

دوای هێرشەکەی دوێنێی سەر کێڵگەی غازی کۆرمۆر، شاندێکی ئەمنیی عێراق بەمەبەستی هەڵسەنگاندن و بەدواداچوون بۆ ڕووداوەکەی کۆرمۆر سەردانی چەمچەماڵ دەکات.

 

چیرۆکی سەرەکی: ئێوارەی ڕۆژی هەینی كاتژمێر 06:40 ‌بە درۆن هێرشکرایە سەر کێڵگەی غازی کۆرمۆر لە چەمچەماڵ، بەهۆیەوە چوار کەس گیانیان لەدەست دا و ژمارەیەکی دیکە بریندار بوون.

 

لێدوانی فەرمی: ڕەمک ڕەمەزان، قایمقامی چەمچەماڵ بە ئاڤا نیوزی گوت، "شاندێکی بەغدا بە هاوبەشی لەگەڵ شاندێکی هەرێمی کوردستان بەمەبەستی بەدواداچوون بۆ هێرشەکە و هەڵسەنگاندنی زیانەکان سەردانی کێڵگەی غازی کۆرمۆر دەکەن".

 

ئەوەی پێویستە بیزانیت: كێڵگەی غازی كۆرمۆر ڕۆژانە چوار هەزار و 200 مێگاوات كارەبا بەرهەم دەهێنێت، بەهۆی هێرشەکەوە  وێستگەکانی بەرهەمهێنانی کارەبا وەستان و بەمەش نزیکەی دوو هەزار و 500 مێگاوات کارەبا کەم دەبێتەوە.