ڕاوێژکارێکی سوودانی: پەکەکە و میلیشیاکان بە پارە بێدەنگ دەکەین

ئاڤا نیوز

ڕاوێژکارێکی سەرۆکوەزیرانی عێراق لەبارەی ڕەخنەی بەشێکی لایەنەکان سەبارەت بە هەڕەشەی میلیشیاکان لەو بارهەڵگرانەی بە ڕێگەی گەشەپێداندا تێدەپەڕن، دەڵێت "پەکەکە و میلیشیاکان بە پارە بێدەنگ دەکەین". 

 

لێدوانی فەرمی: ناسر ئەسەدی، ڕاوێژکاری محەممەد شیاع سوودانی، سەرۆکوەزیرانی عێراق بۆ کاروباری گواستنەوە لە چاوپێکەوتنێکدا لەگەڵ کەناڵی یوتیڤی ڕایگەیاند:  لە هەموو جیهاندا میلیشیاکان بەدوای پارەدا دەگەڕێن، عێراقیش بە پارە پەکەکە و میلیشیاکان بێدەنگ دەکات، بەڵگەش لەسەر قسەکانم ئەوەیە بۆچی لە وڵاتانی کەنداو میلیشیا نییە، لەبەر ئەوەی پارە دەدەن.

 

مەترسییە زانراوەکان: پڕۆژەی ڕێگەی گەشەپێدان کە لە هێڵی ئاسنین و ڕێگەی خێرا پێک دێت، بەندەری فاو و سنووری تورکیا بە درێژایی 1200 کیلۆمەتر پێکەوە گرێ دەدات، تێچوونەکەشی 17 ملیار دۆلارە، بەشێکی لایەنەکان "پەکەکە و میلیشیاکان بە مەترسی لەسەر ڕێگەکە دەزانن". 

 

خاڵە ئەرێنییەکان: ئاڵوگۆڕی بازرگانیی نێوان عێراق و ئیمارات 19 ملیار دۆلارە، پشکی ڕێگەی گەشەپێدان لە ئاڵوگۆڕە لە 70% دەبێت، هەروەها ئاڵوگۆڕی بازرگانی نێوان تورکیا و عێراق 26 ملیار دۆلارە 24 ملیار دۆلاری لەو پڕۆژەیە دەبێت، پڕۆژەی نەخشەڕێگەی گەشەپێدان ساڵی 2028 تەواو دەبێت.