وەزیری پێشمەرگە: هەنگاوەكانی یەكخستنەوەی تەواوەتیی هێزەكان ئەرێنین

ئاڤا نیوز 

وەزارەتی پێشمەرگەی حکومەتی هەرێمی کوردستان کۆبووەوە، وەزیری پێشمەرگە پابەندبوونی وەزارەتەکەی بە خاڵەکانی یاداشتنامەی وەزارەتی بەرگریی ئەمریكا "پێنتاگۆن" دووپاتکردەوە.

وێنە گەورەکە: هەوڵەکان بۆ چاکسازی و یەکخستنەوەی هێزەکانی پێشمەرگەی کوردستان بەردەوامن و تائێستا چەند لیوایەک یەکخراونەتەوە.

 

بۆچی گرنگە: بە یەكخستنەوەی ئەو هێزانە، هێزی پێشمەرگە ڕێكخراوتر و بەهێزتر دەبێت لە بەرەنگاربوونەوەی مەترسییەكان، هاوكارییەكانی هاوپەیمانانیش زیاتر دەبن.

ڕاگەیێنراوی فەرمی: وەزارەتی پێشمەرگە ڕایگەیاند: شۆڕش ئیسماعیل، وەزیری پێشمەرگە بە ئامادەبوونی بریکاری وەزارەت و سەرۆکی ئەرکان و ئەمینداری گشتی و ئەفسەرانی باڵای وەزارەت، سەرپەرشتیی کۆبوونەوەیەکی باڵای نێوان وەزارەتی پێشمەرگە و تیمی باڵای ڕاوێژکارانی سەربازیی هاوپەیمانانی لە هەرێمی کوردستان کرد.

بابەتی ستراتیژی: لە کۆبوونەوەکەدا بە گرنگیی باس لە پرۆسەی چاکسازی، ڕێکخستنەوە و یەکگرتنەوەی سەرجەم هێزی پێشمەرگە کرا، هەردوولا هاوڕابوون لەسەر پرسی سەرکردایەتی و کۆنتڕۆڵی هێزی پێشمەرگە لەسەر ئەو ڕەشنووسەی لەماوەی ڕابردوو کاری لەسەر کراوبوو. 

ئەوەی ئێستا ڕوودەدات: هەنگاوەکان بە ئاراستەی یەکخستنەوەی تەواوەتیی هێزەکان ئەرێنین و بەپێی ئەو بەرنامەیەی دانراوە، پرۆسەی یەکخستنەوە و کۆکردنەوەی هێزەکانی 70 و 80 بۆ سەر وەزارەت بەردەوامی دەبێت. وەزیری پێشمەرگە وای گوت.