ئاوارەکانی عێراق: نامانەوێت بگەڕێینەوە و ئێستا کوردستان وڵاتمانە

ئاڤا نیوز 

 

هەردوو وەزیری پەروەردەی هەرێمی کوردستان و عێراق ئێستا لە کۆبوونەوەدان لەگەڵ محەممەد شیاع سوودانی، سەرۆکوەزیرانی عێراق، کە یەکێک لە پرسە سەرەکییەکانی گفتوگۆکەیان دۆزینەوەی چارەسەری گەڕاندنەوەی قوتابی و خێزانە ئاوارەکانە.

 

ئەوەی ئێستا ڕوودەدات: ماوەیەکە حکومەتی عێراق دەیەوێت ئاوارەکانی نێو هەرێمی کوردستان بگەڕێنێتەوە بۆ زێد و شارەکانی خۆیان، بەڵام ئەمڕۆ لە خۆپێشاندانێکیان لە بەردەم بارەگای نەتەوەیەکگرتووەکان ڕایانگەیاند "نامانەوێت بگەڕێینەوە و ئێستا کوردستان وڵاتمانە".

 

ئەوەی پێویستە بیزانیت: حکومەتی عێراق دەیەوێت لە دوای کۆتاییهاتنی خوێندنی ئەمساڵ، ئاوارەکان بگەڕێنێتەوە زێد و شارەکانی خۆیان.

 

شێوازی جێبەجێکردن: حکومەتی عێراقی بۆ گەڕاندنەوەی هەر خێزانێک ئاوارە تەلەڤزیۆنێک، تەباخێک، بەفرگرێک و چوار ملیۆن دیناری دیاری کردووە.

 

ژمارەکان وادەڵێن: بە پێی ئاماری وەزارەتی ناوخۆی حکومەتی هەرێمی کوردستان، 156 هەزار و 819 خێزان لە ناوەوە و دەرەوەی کەمپەکانی هەرێمی کوردستان دەژین، هاوکات ژمارەی قوتابییەکانیان 148 هەزار 495 قوتابین.