گەشتوگوزاری هەرێمی کوردستان بەڕێژەی زیاتر لە 50% گەشەی کردووە

ئاڤا نیوز

 

بەڕێوەبەری بەبازاڕکردن لە دەستەی گەشتوگوزار ڕایگەیاند، لە کابینەی نۆیەمدا پلانێکی ستراتیژی بۆ گەشتوگوزار دانراوە، ئێستا بەڕێژەی زیاتر لە 50% گەشەی کردووە.

 

بۆچی گرنگە: بووژاندنەوەی کەرتی گەشتیاری بە هەوڵی حکومەت وای کردووە ساڵانە ژمارەی گەشتیار بۆ هەرێمی کوردستان زیاد بێت، ئەمەش کاریگەری لەسەر جووڵەی بازاڕ و شوێنە گەشتیارییەکان هەبووە.

 

لێدوانی فەرمی: سیروان تۆفیق، بەڕێوەبەری بە بازاڕکردن لە دەستەی گەشتوگوزاری هەرێمی کوردستان بە ئاڤا نیوزی گوت: حکومەت پلان و ستراتیژییەکی هەشت ساڵەی بۆ گەشتوگوزار دانەوە، بەوپێیە تاوەکو ساڵی 2030، ژمارەی گەشتیاران دەگاتە نزیکەی 20 ملیۆن گەشتیار.

 

ژمارەکان وا دەڵێن: لە ساڵی 2022 شەش ملیۆن گەشتیار سەردانی هەرێمی کوردستانیان کردووە ئەمە جگە لە سەردانکەرانی ناوخۆ، لە ساڵی 2023 ژمارەکە بۆ زیاتر لە حەوت ملیۆن گەشتیار بەرزبووەتەوە.

 

ئەوەی پێشبینی دەکرێت: دەستەی گەشتوگوزار پێشبینی دەکات ئەمساڵ سەرووی هەشت ملیۆن گەشتیار سەردانی هەرێمی کوردستان بکەن.

 

شێوازی جێبەجێکردن: بە سێ ڕێگا کار لەسەر بەرەوپێشبردنی کەرتی گەشتوگوزار دەکرێت، لەوانەش پەرەپێدانی مرۆیی، بووژاندنەوەی ژێرخانی گەشتیاری و بەبازاڕکردن.