بوتڵی كلۆری ئاوی قەڵادزێ چوار ڕۆژە غازی لێدەچێت و چارەسەر نەكراوە

ئاڤا نیوز

بەڕێوەبەری پڕۆژەی ئاوی خاس لە قەڵادزێ ڕایگەیاند، پێدانی ئاوی خواردنەوە بە هاووڵاتیانی قەڵادزی بەردەوامە و ژەهراوی نەبووە، بەڵام چوار ڕۆژە بوتڵی ئاوی كلۆری ئاوی قەڵادزێ غازی لێدەچێت و چارەسەر نەكراوە.

چیرۆکی سەرەکی: لە ڕۆژی چوارشەممەوە یەکێک لەبوتڵەکانی غازی کلۆری ئاوی پڕۆژەی ئاوی خاس غازی لێدەچێت، گومان دەکرێت ئاوی خواردنەوەی %95ـی دانیشتووانی قەڵادزێی ژەهراوی کردبێت.

زانیاریی پەیامنێر: هەستیار هەژار، پەیامنێری ئاڤا لە دەڤەری ڕاپەرین گوتی " پڕۆژەی ئاوی خاس ئاوی خواردنەوەی 19  هەزار هاوبەشی سنووری قەڵادزێ دابین دەکات، هێشتا گرفتی ئەو بوتڵەی غازی لێدەچێت، چارەسەر نەکراوە".

لێدوانی فەرمی: مارف مەحمود، بەڕێوەبەری پڕۆژەی ئاوی خاس بە ئاڤا نیوزی ڕاگەیاند:"حەوزێکی یەدەگیان بۆ ئەوە دروستکردووە کە هەرکاتێک گرفت بۆ بوتڵی غازەکان دروستبێت بچێتە نێو ئەو حەوزە و "تێکەڵی ئاوی خاوێن نابێت." 

 

بۆچی گرنگە: چارەسەرنەكردنی ئەو لێچوونەی لە بتڵی كلۆری ئاوی خاس هەیە، مەترسی ژەهراویبوونی دانیشتووانی لێدەكەوێتەوە.