ڕەئیسی: متمانەمان بە هەرێمی كوردستان هەیە

ئاڤا نیوز

ئیبراهیم ڕەئیسی، سەرۆککۆماری ئێران، چاوی بە نێچیرڤان بارزانی سەرۆکی هەرێمی کوردستان کەوت و لە کۆبوونەوەیەکدا باسی ئاسایشی هەرێمی کوردستان و ئێران و عێراق کرا.

لێدوانی فەرمی: ئیبراهیم ڕەئیسی سەرۆککۆماری ئێران ڕایگەیاند: پەیوەندییەکانی کوردستان لەگەڵ ئێران لەسەر بنەمای پەیوەندیی مێژوویی، نەتەوەیی، ئایینی و کولتووری دامەزراوە. هیواخوازم ئەم گەشتە ببێتە خاڵی وەرچەرخان لە بەرەوپێشبردنی ئاستی پەیوەندییە سیاسی و ئەمنیی و ئابووری و کولتوورییەکان.

خاڵە ئەرێنییەکان: سەرۆککۆماری کۆماری ئیسلامی، گوتی: "ئێران هیچ بەربەستێکی بۆ فراوانکردنی پەیوەندییە ئابووری و بازرگانییەکانی لەگەڵ هەرێمی کوردستان نییە، بەڵام ئاسایش بناغەی جەوهەری هەر جۆرە پەیوەندییەکە".

ئەوەی پێویستە بیزانیت:"متمانەمان بە نیازپاکی و دۆستایەتی برا کورد و عێراقییەکانمان هەیە، بەڵام چاوەڕوانیشین حکومەتی عێراق و هەرێمی کوردستان بە ڕەهایی ڕێگری لە هەر جۆرە خراپ بەکارهێنانی خاکەکەیان لە دژی ئێران بکەن". ڕەئیسی وای گوت.

شێوازی جێبەجێکردنی ڕێککەوتنەکە: ئیبراهیم ڕەئیسی، وێڕای بەرز نرخاندنی هەوڵەکانی حکومەتی هەرێمی کوردستان و عێراق لە جێبەجێکردنی بڕگەکانی ڕێککەوتنی ئاسایشی عێراق و ئێران، پێداگری لە جێبەجێکردنی ئەو ڕێککەوتنە کردەوە و ڕایگەیاند:" چەکداماڵینی تەواوەتی و نەبوونی گرووپە دژەکانی ئێرن لە  خاکی عێراق، زەروورەتە".