هاوپەیمانیی نەسر: بۆ پۆستی سەرۆکوەزیران مالیکی پشتیوانی عەبادی دەکات

ئاڤا نیوز

 

وتەبێژی هاوپەیمانیی نەسڕ دەڵێت، نووری مالیکی، سەرۆکی هاوپەیمانیی دەوڵەتی یاسا خواستی وەرگرتنی پۆستی سەرۆکوەزیرانی نییە و پشتیوانی کاندیدکردنی حەیدەر عەبادی، سەرۆکوەزیرانی پێشووتری عێراق دەکات.

 

وێنە گەورەکە: لەناو چوارچێوەی هەماهەنگی شیعەکان نۆ کەس وەک کاندید بۆ پۆستی سەرۆکوەزیران ناویان دەهێنرێت، لەوانەش پێنجیان بۆ وەرگرتنی پۆستەکە کێبرکێی بەهێزی یەکتریی دەکەن.

 

لێدوانی فەرمی: سەلام زووبەیدی، وتەبێژی هاوپەیمانیی نەسر کە حەیدەر عەبادی سەرۆکایەتی دەکات بە میدیای عێراقی ڕاگەیاندووە، لە دوایین کۆبوونەوەی سەرکردەکانی چوارچێوەی هەماهەنگی بە فراوانی باس لە یەکلاییکردنەوەی کاندیدی سەرۆکوەزیران کراوە

 

-محەممەد شیاع سوودانی سەرۆکوەزیرانی ئێستا و سەرۆکی هاوپەیمانیی ئاوەدانکردنەوە و گەشەپێدان پێداگرە لەسەر وەرگرتنی خولی دووەمی سەرۆکایەتی حکومەت.نووری مالیکی خواستی وەرگرتنی پۆستەکەی نییە، بۆیە لە جێگەی خۆی ناوی حەیدەر عەبادی سەرۆکوەزیرانی پێشووتری عێراقی پێشنیاز کردووە.

 

-بۆ یەکلاییکردنەوەی کاندیدی سەرۆکوەزیران چوارچێوەی هەماهەنگی کاتی پێویستی لەبەردەستە، بەتایبەتیش کە جارێ کۆبوونەوەی پەرلەمان، هەڵبژاردنی دەستەی سەرۆکایەتی و سەرۆککۆمار نەکراوە، بەڵام لە هەموو دۆخێکدا ماوە دەستوورییەکان بۆ دیاریکردنی سەرۆکوەزیران تێناپەڕێنن.