پەرلەمانتارێكی كورد: هەوڵ دەدەین قەرەبوو بۆ زیانلێكەوتووانی ئاگر لە هەولێر وەربگرین

ئاڤا نیوز  

پەرلەمانی عێراق، لیژنەیەک لەبارەی بەدواداچوون و گەیشتن بە دەرخستی ڕاستییەکان، لەبارەی ڕووداوەكانی ئاگرکەوتنەوە لە هەولێر پێک دەهێنێت.

بۆچی گرنگە: حکومەتی عێراق لە بودجەی ساڵانەیدا بەشە بودجەیەکی بۆ قەرەبووکردنەوەی ئەو ناوچانە تەرخان کردووە کە بە هۆی ڕووداوە سرووشتییەکانەوە زیانیان بەرکەوتووە.

چیرۆكی سەرەكی: ئێوارەی شەوی 5-5-2024، ئاگر لە بەشێکی بازاڕی قەیسەریی شاری هەولێر کەوتەوە، بەو هۆیەوە زیاتر لە 300 دووکان سووتان، سەرۆکوەزیران بارزانی سەردانی بازاڕەکەی کرد و ئاماژەی بەوەدا بە گوێرەی توانا هاوکاری هەموو زیانلێکەوتووان دەکەن، لیژنەیەکیش بۆ لێکۆڵینەوە لە هۆکارەکەی پێک هێنراوە.

لێدوانی فەرمی: لە پەرلەمانی عێراق واژۆمان كۆ كردەوە بۆ ئەوەی قەرەبووی زیانلێكەوتووانی ئاگرەكانی هەولێر بكرێتەوە، بەپێی ماددەی دووی یاسای فریاگووزاری، 500 ملیار دینار قەرەبوو هەیە، ڕەزامەندی سەرۆكوەزیران و وەزیری دارایی دەوێت بۆ ئەوەی پارەكە خەرج بكرێت.
سەباح سوبحی ئەندامی فراكسیۆنی پارتی لە پەرلەمانی عێراق وای بە ئاڤا نیوز گوت.

باکگراوند: تەنیا لە ماوەی سێ مانگی ڕابردوودا پێنج ڕووداوی ئاگرکەوتنەوە لە بازاڕەکانی شاری هەولێر ڕوویان داوە.