ئایدن مەعرووف: بەبێ کورسیی پێکهاتەکان هەڵبژاردن ناکرێت

ئاڤا نیوز

وەزیری هەرێم بۆ کاروباری پێکهاتەکان، ڕایگەیاند "بەبێ کورسیی پێکهاتەکان هەڵبژاردن لە هەرێمی كوردستان ناکرێت".

وێنە گەورەکە: دادگەی فیدراڵی عێراق کورسیی پێکهاتەکانی لە پەرلەمانی کوردستان هەڵوەشاندووەتەوە، پارتی و زیاتر لە 10 لایەنی سیاسی و پێکهاتەکان ئامادە نین بەشداری لە هەڵبژاردندا بکەن و کۆمیسیۆنیش کارەکانی ڕاگرتووە.

لێدوانی فەرمی: ئایدن مەعرووف، وەزیری هەرێم بۆ کاروباری پێکهاتەکان بە ئاڤا نیوزی گوت: بەبێ کورسیی کۆتا هەڵبژاردنی پەرلەمانی کوردستان ناکرێت و دەبێت ئەوان تێیدا بەشدار بن، تاوەکو ئێستا دیار نییە چەند کورسیمان بۆ دەگەڕێتەوە بەڵام بۆ ئەو بابەتە هیوامان هەیە.

ئەوەی پێشبینی دەکرێت: بڕیارە 10-6-2024، هەڵبژاردنی پەرلەمانی کوردستان بەڕێوە بچێت، بەڵام پێشبینی دەکرێت لە چەند ڕۆژی ئایندەدا سەرۆکایەتیی هەرێمی کوردستان مەڕسوومێک لەبارەی دیاریکردنی وادەیەکی نوێ بۆ هەڵبژاردن دەربکات و بۆ چەند مانگێک ئەو پڕۆسەیە دوابخرێت.