لەمەودوا چین ئاژەڵ لە عێراقەوە هاوردە ناکات

ئاڤا دیجیتاڵ

بەهۆی بڵاوبوونەوەی نەخۆشیی "زمانی شین" لەنێو ئاژەڵاندا، چین بڕیاری داوە هاوردەکردنی ئاژەڵ لە عێراقەوە قەدەغە بکات.

 

چیرۆکی سەرەکی: دوای ئەوەی ڕێکخراوی تەندروستیی جیهانی ئاژەڵان لە عێراقەوە ڕاپۆرتێکی لەبارەی نەخۆشییەک پێگەیشت کە لەنێو مەڕ و مانگادا بڵاوبووەتەوە، ئەمەش بووە هۆکارێک بۆ ئەوەی گومرگی چین بڕیار بدات ئاژەڵ لە عێراق هاوردە نەکات. 

 

لێدوانی فەرمی: لە ڕاگەیێنراوێکدا ئیدارەی گشتیی گومرگی چین ڕایگەیاند: هاوردەکردنی ئاژەڵی زیندوویان لە عێراق قەدەغە کرد، ئەو هەنگاوە دوای ئەوە دێت کە ڕاپۆرتێکی عێراق بۆ ڕێکخراوی تەندروستیی جیهانی ئاژەڵان نێردراوە کە نەخۆشیی  "زمانی شین" لەنێو مەڕدا بڵاوبووەتەوە.  

 

لەلایەکی دیکەوە: چین ئەو جۆرە ئاژەڵانە لە وڵاتانی بەلجیکا و هۆڵەنداش هاوردە ناکات، چونکە لەو وڵاتانەشدا نەخۆشیی"زمانی شین" لەنێو ئاژەڵاندا بڵاوبووەتەوە، چین بە نەخۆشییەکی مەترسیدار بۆ سەر ئاژەڵان پۆلێنی کردووە. 

 

ئەوەی پێویستە بیزانیت: نەخۆشیی "زمانی شین"، نەخۆشیێکی ڤایرۆسییە، تووشی مەڕ و مانگا دەبێت، لە ڕێگەی مێرووەوە دەگوازرێتەوە، بەگشتی مردنی ئاژەڵ بەهۆی ئەم نەخۆشییەوە کەمە، بەڵام لە هەموو حاڵەتەکاندا کاتێک ئاژەڵ تووشی ئەم جۆرە ڤایرۆسە دەبێت هەناردەکردن و هاوردەکردنیان ڕادەگیرێت.