دژەتیرۆری کوردستان: هیچ هێرشێک نەکراوەتە سەر فڕۆکەخانەی هەولێر

ئاڤا دیجیتاڵ

دژەتیرۆری هەرێمی کوردستان لە راگەیێنراوێکدا رەتیدەکاتەوە هیچ هێرشێک کرابێتە سەر فڕۆکەخانەی نێودەوڵەتیی هەولێر.

چیرۆکی سەرەکی: بەپێی راگەیێنراوێکی دژەتیرۆری هەرێمی کوردستان، "ئەمڕۆ چوارشەممە 31-1- 2024، لە ژمارەیەک میدیا و کەناڵی ناوخۆیی کە زۆر تامەزرۆی بەئامانجگرتنی هەولێرن، بەبێ پشتڕاستکردنەوە و بەدواداچوونی میدیایی، هەواڵێکیان بڵاوکردووەتەوە گوایە بە درۆنی بۆمبڕێژکراو هێرشکراوەتە سەر فڕۆکەخانەی نێودەوڵەتیی هەولێر".

لێدوانی فەرمی: لە راگەیێنراوەکەدا دژەتیرۆر جەختدەکاتەوە "ئەم هەواڵە بێبنەما و ناڕاستە و هیچ هێرشێک نەکراوەتە سەر فڕۆکەخانەی نێودەوڵەتیی هەولێر".

 

باكگراوند: لەدوای دەستپێكردنی شەڕی نێوان بزووتنەوەی حەماس و ئیسرائیل لە غەززە لە مانگی 10 ساڵی رابردوو، چەندینجار بە مووشەك و درۆنی بۆمبڕێژکراو هێرشكراوەتە سەر هێزەکانی ئەمریکا و هاوپەیمانان لە فڕۆكەخانەی نێودەوڵەتیی هەولێر، بەڵام زۆربەی مووشەک و درۆنەکان لەلایەن هاوپەیمانانەوە خراونەتەخوارەوە و تاوەکو ئێستا هیچ زیانێک بەر فڕۆکەخانە نەکەوتووە.