سەعدی پیرە: ئەگەر هەڵبژاردن لە وادەی دیاری خۆیدا نەکرا کۆتایی دونیا نییە

ئاڤا نیوز 

 

گوتەبێژی یەکێتیی نیشتمانی کوردستان پێیوایە، پێویستە پارتی و یەکێتی لەگەڵ لایەنەکانی دیکە لەسەر کەرکووک بکەونە گفتوگۆ و دەڵێت، "من دڵنیام لەماوەیەکی کورتدا بابەتی پارێزگاری کەرکووک چارەسەر دەکرێت".

 

وێنە گەورەکە: نزیکەی شەش مانگ بەسەر هەڵبژاردنی ئەنجوومەنی پارێزگاکانی عێراق تێپەڕ دەبێت، تاوەکو ئێستا لە کەرکووک حکومەتی خۆجێیی پێکنەهێنراوە و پارێزگار دانەنراوە.

 

لێدوانی فەرمی: سەعدی ئەحمەد پیرە، گوتەبێژی یەکێتی لە کۆنگرەیەکی ڕۆژنامەنووسیدا ڕایگەیاند: ئەو پارێزگارەی بۆ کەرکووک دادەنرێت هی هەموو پێکهاتەکان دەبێت و پێویستە پارتی و یەکێتی لەگەڵ لایەنەکانی دیکەی پارێزگاکە بکەونە گفتوگۆ بۆ چارەسەرکردنی کێشەی پارێزگار، کەسێک دابنرێت کە بتوانێت پارێزگاکە بگەڕێنرێتەوە دۆخی خۆی.

 

زانیاریی زیاتر: سەعدی پیرە گوتی: باشترە هەڵبژاردن لە کاتی خۆیدا بکرێت، بەڵام ئەگەر نەشکرا ئەوە کۆتایی دونیا نییە و دەتوانرێت دواتر بکرێت، "ئێمەش دڵنیاین قورسە ڕۆژی 10ـی حوزەیران هەڵبژاردن بکرێت".

 

لە لایەکی دیکەوە: ئیسماعیل حەدیدی، سەرکردە لە هاوپەیمانی عەرەبی بە ئاڤا نیوزی گوت: "لێکتێگەیشتن لەگەڵ یەکێتی هەیە، بۆئەوەی پۆستی پارێزگار لەنێوان کورد و عەرەب دوو ساڵ بە دووساڵ بێت."