پرۆسەی پێدانی زەوی بە فەرمانبەران خێراتر دەکرێت

ئاڤا نیوز

 

وەزیری شارەوانی لەگەڵ بەڕێوەبەرایەتیی گشتیی شارەوانییەکانی پارێزگا و ئیدارە سەربەخۆکان سەبارەت بە ڕێکارەکانی دابەشکردنی زەوی کۆبوونەوە.

 

وێنە گەورەکە: دوای 18 ساڵ لە ڕاگرتنی زەوی بەسەر فەرمانبەراندا دابەش دەکرێت، حکومەتی هەرێمی کوردستان لە مانگی سێی ئەمساڵ بڕیارێکی لەوبارەیەوە دەرکردووە.

 

بۆچی گرنگە؟ بڕیارەکەی حکومەت، 30%ـی فەرمانبەران دەگرێتەوە کە نزیکەی 200 هەزار کەس دەکات، هەر فەرمانبەرێکیش دەتوانێت بە پێی سنووری جوگرافی و کارکردنی سودمەند ببێت، بەو مەرجەی پێشتر لە یەکەی نیشتەجێبوون و زەوی سودمەند نەبووبێت.

 

ڕاگەیێنراوی فەرمی: وەزارەتی شارەوانی و گەشتوگوزار ڕایگەیاند کە "بەدواداچوون بۆ کارەکانی پڕۆسەی دابەشکردنی زەوی کراوە، پێشتر داوا لە سەرجەم شارەوانییەکان کرا دەست بە ڕێکارەکانی پڕۆسەکە لەسەر نەخشە بکەن و زەوی پێشنیازکراو لەگەڵ کێشە و گرفتەکانیان دەستنشان بکەن".

 

لەلایەکی دیکەوە: سەرجەم شارەوانییەکانیش نەخشەکانیان ڕادەستی وەزارەتی شارەوانی کردووە وەک کێشەی دابینکردن و کوژاندنەوەی زەوی و فراوانکردنی ماستەرپلانی هەندێک لە شارەوانییەکان.

 

ئەوەی پێویستە بیزانیت: ‌حکومەتی هەرێمی کوردستان ڕژدە لە دابەشکردن و دابینکردنی زەوی لەسنووری شارەوانییەکان ئەگەر زەویش نەمابێت لە جێگایەکی دیکە بۆیان دابین بکرێت.

 

هۆکارە زانراوەکان: ستافێکی تایبەت لە بەڕێوەبەرایەتیی شارەوانییەکان بۆ ڕووپێوکردنی زەوی و بەڕێوەبردنی پڕۆسەکە، دیاری دەکرێت تا بەخێرایی بەڕێوە بچێت.