نێچیرڤان بارزانی بۆ گەلی ئێران: دڵمان لاتانە و نزای خێرتان بۆ دەکەین

ئاڤا نیوز

 

سەرۆکی هەرێمی کوردستان ڕایدەگەیێنێت، بە نیگەرانییەكى قووڵەوە چاودێریی هەواڵەکانی ڕووداوی هیلیکۆپتەری سەرۆک ڕەئیسی دەکات و "نزای خێریان" بۆ دەکات.

 

بۆچی گرنگە؟ پرۆسەی گەڕان بەدوای هێلیکۆپتەرە ونبووەکەی سەرۆککۆماری ئێران بەردەوامە و تاوەکو ئێستا چارەنووسی سەرۆککۆمار و ئەو بەرپرسە باڵایانەی لەگەڵی بوونە، دیار نییە.

 

وێنە گەورەکە: ئەمڕۆ لە پارێزگای ئازەربایجانی ڕۆژهەڵاتی ئێران، سەرۆککۆماری ئێران و هاوتا ئازەربایجانییەکەی بەنداوێک دەکەنەوە. دوای گەڕانەوەی بۆ تەورێز، "لەبەر خراپیی کەشوهەوا" هێلیکۆپتەرەکە ناچار بوو بەر لە گەیشتنی بە شوێنی مەبەست بنیشێتەوە.

 

پەیامی فەرمی: نێچیرڤان بارزانی، سەرۆکی هەرێمی کوردستان ڕایگەیاند: "بە نیگەرانییەكى قووڵەوە چاودێریی هەواڵەکانی ڕووداوی هێلیکۆپتەری سەرۆک ڕەئیسی دەکەم. لە خوای مەزن داواکارم خۆیان و یاوەرانی باش و سەلامەت بن".

 

زانیاریی زیاتر: سەرۆکی هەرێمی کوردستان ئاماژەی بەوەش کردووە، دڵمان لایانە و نزای خێریان بۆ دەکەین، لەم کاتە سەختەدا بیرمان لەگەڵ سەرکردایەتی و گەلی ئێرانی دۆست و دراوسێدایە.