50%ـی کارگەکانی پارێزگای سلێمانی لە کارکردن دەوەستن

ئاڤا نیوز

 

ساڵی ڕابردوو 516 کارگەی جیاواز لە سنووری پارێزگای سلێمانی داخراون، ئەوانەشی لە کارکردن بەردەوامن چاوەڕوانی جێبەجێکردنی بڕیارێکی ئەنجوومەنی وەزیرانی هەرێمی کوردستان بۆ کەمکردنەوەی نرخی کارەبای بازرگانی دەکەن.

 

وێنە گەورەکە: لە کۆی هەزار و 34 کارگەی تۆمارکراو لە سنووری پارێزگای سلێمانی، 516 کارگە داخراون، کە دەکاتە 50%ـی ئەو کارگانەی لە پارێزگاکە تۆمارکراون.

 

لێدوانی فەرمی: ئارام بابان، سەرۆکی لیژنەی پیشەسازی لە ژووری بازرگانیی پیشەسازی سلێمانی بە ئاڤا نیوزی ڕاگەیاند: کارگەکانی سلێمانی لە خراپترین دۆخدان و ڕۆژانە کارگەی دیکە دادەخرێن، کێشەکانیان زۆرن، بەڵام سەرەکیترینیان بەرزی نرخی کارەبایە. 

 

هۆکارە زانراوەکان: یەکێکی دیکە لە هۆکارەکانی داخستنی کارگەکان لە سنووری سلێمانی لە هاوردەکردنی کەلوپەلی بەرهەمهێنراوە لە وڵاتانی دەرەوە بەشێوەی "قاچاخ و فرۆشتنەوەی بە نرخی هەرزانتر". 

 

خاڵە ئەرێنییەکان: کابینەی نۆیەم وەک پشتیوانی و پاڵپشتی بۆ کارگە نێوخۆییەکان، بڕیاری کەمکردنەوەی نرخی کارەبای بازرگانی داوە، "ئەو کارگانەی کە دانەخراون چاوەڕوانی جێبەجێکردنی ئەو بڕیارەی ئەنجوومەنی وەزیرانن".