تورکیا کوژرانی 17 گەریلا و شەڕڤانی راگەیاند میدیای پەكەكەش ڕەتیدەكاتەوە

ئاڤا دیجیتاڵ

لە درێژەی شەڕ و پێکدادانەکانی نێوان سوپای تورکیا و گەریلاکانی پارتی کرێکاران لە سنوورەکانی نێوان هەرێمی کوردستان و تورکیا لە لایەک، لە رۆژئاوای کوردستانیش لە لایەکی دیکەوە،  وەزارەتی بەرگری تورکیا، کوژرانی 13 شەڕڤانی هەسەدە و چوار گەریلای پەکەکەی ڕاگەیاند.

چیرۆکی سەرەکی: لە ناوچەی فوراتی سنوری سووریا، شەڕڤانانی هێزەكانی سووریای دیموكرات "هەسەدە"   هێرش دەکەنە سەر سوپای تورکیا دوای پێکدادانێکی توند لە نێوانیان، بە گوێرەی زانیارییەکانی وەزارەتی بەرگری تورکیا 13 شەڕڤانیان کوشتووە. 

زانیاری زیاتر: لە ناوچەی ئۆپەراسیۆنی (پەنجە-کلیت)ی سنووری نێوان هەرێمی کوردستان و تورکیا، سوپای تورکیا هێرشی کردووەتە سەر پەکەکە و دەڵێن "چوار گەریلای پارتی کرێکاران کوژراون".

لەلایەکی دیکەوە: میدیای نزیک لە پەکەکە باس لەوە دەکات لە" زاپ و خواکورک هێرشیان کردووەتە سەر بنکە سەربازییەکانی تورکیا و دوو سەربازی تورکیایان کوشتووە"، هەروەها کوژرانی ئەو 13 شەڕڤانەیان پشتراست نەکردووەتەوە.

باکگراوند: بەهۆی بۆردوومانە  بەردەوامەکانی تورکیا بۆ سەر پێگە و بارەگاکانی پەکەکە، لە گوندەکانی نزیک  ئامێدی سەر بە پارێزگای دهۆک،  هاووڵاتیان مالەکانیان جێهێشتووە و گوندەکان چۆڵکراون،  زیانێکی زۆر بەر زەوییە کشتوکاڵیەکانی ئەو ناوچەیە کەوتووە. 

لە رۆژئاوای کوردستانیش، بۆردوومانەکانی تورکیا پاڵاوگە و وێستگەی کارەبای ئەو ناوچانەی کردووەتە ئامانج و زیانێکی زۆری ئابووری بە ناوچەکە گەیاندووە.