خانمە ئەکتەرێک بەهۆی فەڵەستینەوە یاساکانی کان پێشێل دەکات

ئاڤا نیوز

 خانمە ئەکتەرێکی ئوستوراڵی یاسایەکی فیستیڤاڵی فیلمی کان پێشێل دەکات، زۆرێک لە لایەنگرانی بۆ ئەو کارەی ستایشیان کرد.

چیرۆکی سەرەکی : کەیت بلانچێت، خانمە ئەکتەری ئوستوراڵی بە بەکارهێنانی ڕەنگی ئاڵای فەڵەستین لە جلەکانیدا دەبێتە جێی سەرنجی میدیاکان و دەنگدانەوە بە دوای خۆیدا دەهێنێت، بە تایبەت لە دوای ڕۆشتنی بەسەر فەرشی سووردا و نیشاندانی بەشێکی جل و بەرگەکەی کە پێکهاتبوو لە ڕەنگی سەوزی ئاڵای فەڵەستین.

کاریگەری و لێکەوتەکان: زۆرێک لە بەکارهێنەرانی سۆشیاڵ میدیا ستایشی هەڵوێستی 'کەیت'یان کرد کە سەرپێچی یاسای فێستیڤاڵەکەی کردووە و بۆیان نووسیوە ' کەیت دڵێکی ئازا و بوێرانەی هەیە و ئەمساڵ گرنگترین و مانادارترین دەرکەوتنی هەبوو ' .

ئەوەی پێویستە بیزانیت: یەکێک لە یاساکانی فێستیڤاڵی فیلمی کان ئەوەیە ئەوانەی دەچنە نێو فیستیڤاڵەکە نابێت لە ڕێی هیچ ئاماژەیەکەوە پشتیوانی یاخود هاوخەمی خۆیان بۆ هیچ لایەنێک و بارودۆخێکی سیاسی دەرببڕن.

وێنە گەورەکە: لە حەوتی ئۆکتۆبەری ساڵی ڕابردووەوە شەڕ لە غەززە لە نێوان ئیسرائیل و حەماس دەستیپێکردووە، تائێستا زیاتر لە 35 هەزار کەس کوژراون و دەیان هەزار کەسی دیکەش برینداربوون، زیاتر لە ملیۆنێک سڤیلیش ئاوارەبوون.