کاژمێر 12ـی ئەمشەو وادەی خۆتۆمارکردن لە پسوولەی ئەلیکترۆنی خۆراک تەواو دەبێت

ئاڤا نیوز

بەڕێوەبەری گشتیی بازرگانیی هەرێمی کوردستان دەڵێت، زوو خۆتان تۆمار بکەن تا بەشە خۆراکتان نەبڕاوە، ئەمشەو کاژمێر 12 دوا وادەی خۆتۆمارکردنە لە پسوولەی ئەلیکترۆنی خۆراک و درێژناکرێتەوە.

وێنە گەورەکە: وەزارەتی بازرگانی عێراق بڕیایداوە فۆڕمی خۆراک لەسەرتاسەری عێراق بکرێتە ئەلیکترۆنی و لەو ڕێگەیەوە بەشەخۆراکی مانگانە دابەشبکرێت، ئەمەش بە دوو قۆناغ دەکرێت قۆناغی یەکەم لە مانگی ئایار دەستی پێکرد كە پڕۆسەی خۆتۆمارکردن بوو، قۆناغی دووەم بریتی دەبێت لە کاراکردنی خزمەتگوزارییەکان لەوانە وەک گواستنەوە و تۆمارکردنی ئەندامی تازە.

لێدوانی فەرمی: نەوزاد شێخ کامیل، بەڕێوەبەری گشتیی بازرگانیی هەرێمی کوردستان،  بە ئاڤای ڕاگەیاند: كاتژمێر 12ـی ئەمشەو دوا وادەی خۆتۆمارکردن دەبێت لە پسوولەی ئەلیکترۆنی خۆراک و درێژناکرێتەوە و ئەو کەسانەی پڕیان نەکردووەتەوە بێبەش دەبن لە بەشەخۆراکی مانگانە تا دەرفەتێکی دیکە بۆ کاراکردنەوەی خۆتۆمارکردن کە تاوەكوو ئێستا، کاتەکەی دیار نییە.

ئەو بەڕێوەبەرەی وەزارەتی بازرگانی داواش لە هاووڵاتیان دەكات لەو چەند كاتژمێرەی كە ماوە، خۆیان تۆمار بكەن.

زانیاریی زیاتر: بەڕێوەبەری گشتیی بازرگانیی هەرێمی کوردستان گوتیشی، تاوەکو مانگی ئابی ئەمساڵ هاونیشتمانییانی هەرێمی کوردستان بە ڕێژەی 87% خۆیان تۆمار کردبوو، دوای ئەوە دوو جاری دیکە ماوەی خۆتۆمارکردن درێژکرایەوە، دوای وەستانی خۆتۆمارکردن سیستمەکە دەری دەخات ئەمجارە رێژەی خۆتۆمارکردن بووە بە چەند.

هۆکارە زانراوەکان: نەوزاد شێخ کامیل، بەڕێوەبەری گشتیی بازرگانیی هەرێمی کوردستان،  ئەم هۆکارانەی دەستنیشان کرد بۆ ئەو خێزانانەی کە خۆیان تۆمار نەكردووە:

٠ نەبوونی کارتی نیشتیمانی.
٠ سەفەرکردن.
٠ نەبوون یان خراپی هێڵەکانی ئینتەرنێت بەتایبەت لە گوندە دوورە دەستەکان و سەر سنوورەکان.