بە ئامادەبوونی سەرۆكوەزیران بارزانی رێوڕەسمی ساڵیادی شەهیدانی یەکی شوبات لە هەولێر بەڕێوەدەچێت

ئاڤا دیجیتاڵ 

20 ساڵ بەسەر تەقینەوەکانی یەكی شوبات تێپەڕدەبێت، بە ئامادەبوونی سەرۆکوەزیران بارزانی، ڕێوڕەسمی ساڵیادی شەهیدانی ئەو ڕۆژە بەڕێوەدەچێت.

چیرۆکی سەرەکی: سەرلەبەیانی ئەمڕۆ پێنجشەممە 01-02-2024 کاتژمێر نۆ، لە مۆنیۆمێنتی شەهیدانی یەكی شووبات لە پارکی سامی عەبدولڕەحمان لە هەولێر، ڕێوڕەسمێک بەبۆنەی ساڵڕۆژی تەقینەوەکانی لقی دووی پارتی دیموكراتی كوردستان و مەڵبەندی سێی یەکێتی نیشتیمانیی كوردستان لە هەولێر بەڕێوەدەچێت و تاجەگوڵینەی وەفاداری لەسەر مۆنیۆمێنتەکە دادەنرێت.

لێدوانی فەرمی: ئەگەر چی تیرۆریستان ئەو کارە قێزەوونەیان بۆ تێکدانی ئاشتی و گیانی لێبوردەیی و خۆشیەکانی جەژن بوو، بەڵام خوێنی شەهیدان و قوربانییەکان بوونە هەوێنی زیاتر بەهێزکردنی گیانی پێکەوەژیان و تەبایی و یەکێتی ڕیزەکانی گەلی کوردستان، ئەمە ڕاگەیێنراوی وەزارەتی شەهیدان و ئەنفالکراوانە لە ساڵیادی تەقینەوەكانی یەكی شووبات.

زیانە سەرەکییەکان: ئه‌م ڕووداوه‌ له‌ یه‌كه‌مین ڕۆژی جه‌ژنی قوربانی پیرۆز بوو، بەهۆیەوە 103 کەس لە هەردوو بارەگا شەهید بوون و 246 کەسی دیکەش برینداربوون.

ئەوەی پێویستە بیزانیت: لە یەكی شووباتی ساڵی 2004 کە هاوکات بوو لەگەڵ یەکەم رۆژی جەژنی قوربان له‌ كاتی خۆشی ده‌ربڕین و جه‌ژنانه‌ی خه‌ڵك ، لە هەردوو بارەگای  لقی دووی پارتی دیموکراتی کوردستان و مەڵبەندی سێی یەکێتی نیشتمانیی کوردستان دوو تەقینەوەی خۆکوژی ڕوویاندا، بەهۆیەوە خوێنی ده‌یان سه‌ركرده‌و پێشمه‌رگه‌و خه‌ڵكی بێتاوان ئاوێتە بوون.