سەید ئەحمەد پێنجوێنی: ئەگەر بانگدانی ئەلیکترۆنی بۆ نەهێشتنی فەوزا بێت باشە

ئاڤا نیوز 

وەزارەتی ئەوقاف و کاروباری ئایینی حكومەتی هەرێمی كوردستان، تەندەرینی بۆ پڕۆژەی بەئەلیکترۆنیکردنی بانگدان کردووە و ئەمەش مامۆستایانی ئایینی و هاووڵاتیانی کردووەتە دووبەش.

بۆچی گرنگە: لە هەرێمی کوردستان نزیکەی شەش هەزار مزگەوت هەن کە هەندێکیان بەپێی ماستەرپلانی گەڕەکەکان دانەنراون، ئەمەش وای کردووە بەشێک لە هاووڵاتیان گلەیی لە ناڕێکی بانگدان و خۆش نەبوونی دەنگی بەشێک لە بانگبێژان بکەن.

لێدوانی فەرمی: مەریوان نەقشبەندی، گوتەبێژی پێشووی وەزارەتی ئەوقاف، ڕایگەیاند: لە 2015 پڕۆژەی بانگدانی ئەلیکترۆنیم پێشکەش وەزارەتی ئەوقاف و کاروباری ئایینی کرد، کۆمپانیایەک بڕیاریدا بێ بەرامبەر کارەکە بۆ ماوەی 10 ساڵ ئەنجام بدات.

شێوازی جێبەجێکردنەکە: بەرنامەکە وابوو کە ناوەندێک لە وەزارەتی ئەوقاف وەک ناوەندێک دابنرێت، بەپێی کاتی بانگ لە شارەکان بانگی لێبدرێت، بەڵام بەشێک لە مامۆستایانی ئایینی گوتیان ڕۆحیەتی بانگ دەکوژێ و ئەوەبوو وەزیری ئەوقافیش ڕەزامەند نەبوو.

لە لایەکی دیکەوە: سەید ئەحمەد پێنجوێنی بانگخواز و پێشنوێژ، بە ئاڤا نیوزی گوت: ئەگەر ئەم پڕۆژەیە بۆ ڕێکخستن و نەهێشتنی دەنگی ناخۆش و فەوزا و پاش و پێشی بانگەکە بێت ئەوا کارێکی باشە، لە شەرعدا ئەو کەسەی بانگ دەدات دەبێت وەک قورئانخوێن دەنگی خۆش بێت.