ئەمریكا و بەریتانیا چەند پێگەیەکی حووسییەکانیان بەئامانج گرت

ئاڤا دیجیتاڵ

 

میدیای حووسییەکان ڕایگەیاند، فڕۆكە جەنگییەكانی ئەمریكا و بەریتانیا چەند بنكەیەكیان لەناو خاكی یەمەن بۆردوومان كردووە.

 

لێدوانە فەرمییەكان: میدیای فەرمی حووسیەكان لە یەمەن دەڵێت: ئەمریکا و بەریتانیا ئەمڕۆ هەینی 02-02-2024 سێ هێرشیان کردە سەر پارێزگای حەجە لە باکووری ڕۆژهەڵاتی یەمەن و زیانیان هەبووە.

 

لەلایەکی دیکەوە: تاوەکو ئێستا هیچ سەرچاوەیەکی ئەمنیی ئەمریكا و بەریتانیا بەفەرمی ئەم هەواڵەی ڕانەگەیاندووە كە هێرشیان كردبێتە سەر حووسیەكان لەناو خاكی یەمەن ، بەڵام پێشتر سێ هێرشیان كردووەتە سەریان و بە فەرمیش ڕایانگەیاندووە.

 

ئەوەی پێویستە بیزانیت: حووسییەكان لە لایەن ئەمریكاوە لە ڕۆژی 16ـی شوباتەوە خرانە لیستی تیرۆرەوە، بۆ ئەوەی واز لە هێرشەكانیان بهێنن بۆ سەر كەشتییەكان لە دەریای سوور، بەڵام حووسیەكان بەردەوامبوون.

 

هۆکارە زانراوەکان: هەموو ئەو كارانەی حووسیەكان لە دەریای سوور دەیكەن، دەڵێن بۆ پشتیوانی لەغەزە و دەبێت ئیسڕائیل بكشێتەوە، واز لە داگیركاری بهێنن.

 

باکگراوند: بەپێی بەدواداچوونەكان لە سەرەتای شەڕی نێوان گرووپە چەكدارەكان و سوپای ئیسرائیل، حووسییەكان چەندین جار هێرشیان كردووەتە سەر كەشتییە نەوتییەكان لە دەریای سوور، لە 19-1-2024ـەوە 30 جار بە درۆن و مووشەک هێرشیان کردووە.