لە ئیدارەی سۆران کێشەی کارەبا نامێنێت

ئاڤا نیوز 

 

بڕیارە پڕۆژەیەکی 100 مێگاواتی کارەبا لە ڕێگەی وزەی با لە ئیدارەی سۆران جێبەجێ بکرێت، بەرپرسانی ئیداریی ناوچەکە دەڵێن، ئیتر سۆران کێشەی کارەبای نامێنێت.

 

بۆچی گرنگە: بە جێبەجێکردنی پڕۆژەکە کێشەی کارەبا لە تەواوی سۆران نامێنێت، جگە لەوە سوودێکی دیکەی هەیە، کە هیچ پاشماوەیەکی گازی نییە، چونکە بە وزەی با کار دەکات.

 

لێدوانی فەرمی: ئەردەوان ئیبراهیم، بەڕێوەبەری کارەبای ئیدارەی سەربەخۆی سۆران بە ئاڤا نیوزی ڕاگەیاند، جێبەجێکردنی ئەم پڕۆژەیە دەبێتە تاکە پڕۆژەی ڕۆژهەڵاتی ناوەڕاست کە بە وزەی با کارەبا بەرهەم بێت.

زانیاریی زیاتر: پڕۆژەی كارەبای 100 مێگاواتی ئیدارەی سۆران، بڕیارە لە گەڕەکی دێلێزیان دابنرێت و بە بڕی 235 ملیار دینار لەسەر بودجەی وەزارەتی کارەبا جێبەجێ دەکرێت و بە 18 مانگ تەواو دەکرێت.

 

ئەوەی پێویستە بیزانیت: لە کابینەی نۆیەم، پرۆژەی دابینكردنی وێستگەیەکی مۆبایلی كارەبا و ڕاكێشانی 6 فیدەری 11 كەی ڤی لە وێستگەی كارەبای دێلێزیان و وێستگەی بەرهەمهێنانی 100 مێگاوات کارەبا و ڕاکێشانی هێڵی 132 کەی ڤیی سۆران - چۆمان - حاجی ئۆمەران جێبەجێ کراون.

لەلایەکی دیکەوە: ئێستا دوو وێستگەی دیکە 50 مێگاواتی بە مەبەستی دابین کردنی کارەبا  بۆ 51 گوندی سنووری قەزای مێرگەسوور ، بە گوژمەی  10 ملیۆن دۆڵار  جێبەجێ دەکرێت.