نەتەوەیەکگرتووەکان: 17 هەزار منداڵی غەزە لە خێزانەکانیان دابڕاون

ئاڤا دیجیتاڵ

 

لە ئامارێکی نوێی ڕێکخراوی نەتەوەیەکگرتووەکاندا، دوای چوار مانگ لە شەڕ، نزیکەی 17 هەزار منداڵی فەڵەستینی لە خێزانەکانیان دابڕاون.

 

وێنە گەورەکە: لە 07ـی ئۆکتۆبەری ئەمساڵەوە، هەواڵی کارەساتباری خەڵکی لێقەوماوی غەزە بووەتە گرنگترین ڕووداوەکانی ڕۆژ، ڕێکخراوەکانی مافی مرۆڤی ڕۆژانە ئاماری نوێی قوربانییەکان بڵاودەکەنەوە، منداڵانی غەزە قوربانی سەرەکی ئەم شەڕەن، بەپێی ڕاگەیێنراوی نوێی یونسێف "ئێستا بە ملیۆنان منداڵی فەڵەستینی بەهۆی بۆردوومانە بەردەوامەکان تووشی ترس، دڵەراوکێ و کەمخەوی بوونە و پێویستییان بە چارەسەری دەروونی هەیە.

 

لێدوانی فەرمی: "ئەم ژمارەیە 1%ـی کۆی ژمارەی ئاوارەبووەکان (لە یەک ملیۆن و 700 هەزار کەس) پێکدەهێنێت". باسی لەوەش کرد: "هەموو کەسێک چیرۆکێکی دڵتەزێنی لەدەستدان و خەم و پەژارەی هەیە". جۆناسان کریکس، بەرپرسی پەیوەندییەکانی یونیسێف بۆ کاروباری خاکە داگیرکراوەکانی فەلەستین وای گوت. 

 

زانیاریی زیاتر: زۆربەی ئەو منداڵانەی بەهۆی بۆردوومانەکانەوە دەگەیێنرێنە نەخۆشخانەکان، لەژێر کاریگەریی بۆمبەکاندا بەجۆرێک ترساون، ناوی خۆشیان بیرچووەتەوە، لەبەر ئەو هۆکارە ناتوانرێت ناسنامەی زۆربەی منداڵەکان دیاربکرێت، هەر بۆیە 17 هەزار منداڵ  بێ خانەوادە ماونەتەوە.

 

 پێدراوە ڕاستەکان: لە هێرشەکەی حەماس بۆ سەر خاکی ئیسرائیل لە 07ـی ئۆکتۆبەری ئەمساڵ نزیکەی 250 کەس ڕفێنراون و گواستراونەتەوە بۆ کەرتی غەزە، بەگوێرەی زانیارییەکانی سوپای ئیسرائیل، تاوەکو ئێستا 132 کەسیان بە بارمتە گیراون، سوپای ئیسرائیل 27 بارمتەی کوشت.

 

باکگراوند: بەگوێرەی ئاماری نوێی وەزارەتی تەندروستی غەزە، لە 07ـی ئۆکتۆبەرەوە 27 هەزار و 131 کەس گیانیان لەدەستداوە کە زۆربەیان ژن و منداڵن.