وەزارەتی سامانە سروشتییەكان: هەفتەی ئایندە سەردانی بەغدا دەكەین

ئاڤا نیوز

 

وەزارەتی سامانە سروشتییەکان وەڵامی وەزارەتی نەوتی عێراق دەداتەوە، کە داوای کۆبوونەوەیەکی بەپەلەی کردبوو بە مەبەستی خێراکردنی گەڕانەوەی بەرهەمهێنان لە کێڵگەکانی هەرێمی کوردستان و هەناردەکردنەوەی نەوتی کوردستان.

وێنە گەورەکە: چوارشەممە 29-5-2024، سەرۆکوەزیران بارزانی وەزارەتی سامانە سرووشتییەکانی ڕاسپارد ئەگەر بۆ بابەتی نەوت پێویستی کرد سەردانی بەغدا بکەن، لەگەڵ حکومەتی فیدراڵ و کۆمپانیا نەوتییەکان کۆ ببنەوە.

ڕاگەیێنراوی فەرمی: سەبارەت بە نووسراوی وەزارەتی نەوتی عێراق بۆ کۆبوونەوەی بەپەلە بۆ چارەسەرکردنی کێشەی هەناردەکردنی نەوتی هەرێم، ئێمە وەکو وەزارەتی سامانە سروشتییەکان هەر لە سەرەتاوە لەگەڵ ئەوەدا بووین بەزووترین کات کێشەکە چارەسەر بکرێت و نەوتی هەرێم لە ڕێگەی بەندەری جیهانەوە بۆ دەرەوە هەناردە بکرێت. 

زانیاریی زیاتر: بۆ ئەم مەبەستە چەندین جار سەردانی بەغدامان کردووە و لە مانگی کانوونی دووەمی ئەمساڵ لەگەڵ سەرۆكی لیژنەی دارایی پەرلەمان و هەروەها لەگەڵ لیژنەی حکومەتی فیدراڵ، لە هەرسێ وەزارەتی نەوت و پلاندانان و دارایی کۆبووینەوە و کۆنووسەکەشی واژۆ کرا.

لە لایەکی دیکەوە: وەزارەتی سامانە سروشتییەکان دەڵێت: "ئامادەین هەفتەی ئایندە سەردانی بەغدا بکەین بەمەبەستی چارەسەری ئەم بابەته".