ڕاوێژکارێکی سوودانی: هەموو شتێک ئامادەیە بۆ هەناردەکردنەوەی نەوتی کوردستان

ئاڤا نیوز

 

ڕاوێژکاری میدیایی سەرۆکوەزیرانی عێراق ڕایدەگەیێنێت، ڕێکارەکانی هەناردەکردنەوەی نەوت ئامادەن، نزیکبوونەوەیەکی زۆر لەنێوان حکومەتی هەرێمی کوردستان و عێراق هەیە بۆ یەکلاکردنەوەی کێشەکان و چارەسەربوونیان.

 

وێنە گەورەکە: پێنجشەممە سەرۆكوەزیران بارزانی بۆ چارەسەری كێشەكانی نێوان هەرێمی كوردستان و عێراق گەیشتە بەغدا و هەر ئەمڕۆ چاوی بە گەورە بەرپرسان دەكەوێت بە مەبەستی چارەسەرکردنی پرسە هەڵواسراوەکانی نێوان هەولێر و بەغدا.

 

لێدوانی فەرمی: عائید هیلالی، ڕاوێژکاری میدیایی محەممەد شیاع سوودانی، سەرۆکوەزیرانی عێراق بە ئاڤا نیوزی ڕاگەیاند: "ڕێکارەکانی هەناردەکردنەوەی نەوت ئامادەن، هەمووو شتێک ئامادەیە، تەنیا ئەوەی ماوەتەوە حکومەتی هەرێمی کوردستان و حکومەتی عێراق بگەنە ڕێککەوتن، ئەم دۆسیەیەش یەکێک دەبێت لە بابەتی گفتوگۆکانی نێوان سەرۆکوەزیران بارزانی و سەرۆکوەزیرانی عێراق". 

 

ئەوەی ئێستا ڕوودەدات: سەرۆكوەزیران بارزانی لە بەغدایە و لە کاتی گەیشتنی ڕایگەیاند: لە بەغدام بۆ جەختکردنەوە لەسەر دابینکردنی مافەکانی خەڵکی کوردستان و چارەسەرکردنی ناکۆکییەکان بە گفتوگۆ و لەسەر بنەمای دەستوور، دەبێت سەقامگیریی و ئابوورییەکی بەهێز کاری لەپێشینەمان بێت.